رفض شعبي لتغيير هويته التراثية
«الراي» ترصد نبض الناس تجاه المساس بسوق المباركية
- كل شي بتطمسونه؟ ما يصير هذا تراث قديم
- جنكم قطيتوا والدينكم دار العجزة
- نبي المباركية القديمة بعطرها الخنين
- هذا تشويه وليس تطوير
- ما كفاكم المدينة الترفيهية؟ خلوا المباركية لنا
- لهالدرجة متبرين من تاريخكم؟
في ما يلي بعض ردود الفعل الشعبية التي رصدتها «الراي» من بين آلاف المواقف التي عبّر فيها المواطنون عن رفضهم للتصميم الجديد لتطوير سوق المباركية ومطالبتهم بالحفاظ على طابعه التراثي:
• مشروع جميل ولكن لا يمت لتاريخ سوق المباركية بِصلة، يجب الحفاظ على الطابع التراثي لهذا السوق ويتم التجديد والترميم على هذا النحو.
• نحن بحاجة للمزيد من المشاريع السياحية، لماذا لا يتم طرح هذا المشروع في مكان آخر ويكون بوابة تربط بين الماضي والحاضر بأسلوب حديث ولكن ليس في سوق المباركية؟
• حلاوة سوق المباركية بالتراث القديم والبسيط، اللي مهما كان قديما تلاقي الناس تبي تزوره وتقضي وقتها فيه، بس الواضح أن هالتراث القديم بيصير ذكرى كانت وانتهت.
• يعني حتى المباركية خربتوها!
• ميزة سوق المباركية البساطة التي كانت فيه وكذلك كبار السن الذين كانوا يضيفون رونقاً جميلاً لهذا السوق العريق.
• لا مو چذي.. ما يصير يغيرون المباركية لازم يحافظون على تاريخها.
• وين «سوق المباركية» بالتطوير اللي حاطينه!
• كل شي بتطمسونه ما يصير هذا تراث قديم.
• جنكم قطيتوا والدينكم دار العجزة يبا لا نقبل بتغيره عاجبنه سوق المباركية.
• سر سوق المباركية يكمن في بساطته ويعتبر تراث دولة ومن غير المقبول أو المعقول تدمير كل ما هو تراثي... اتركوا هالخرابيط عنكم.
• بحثت عن الهوية التراثية القديمة الكويتية بهذي الصور الجديدة لسوق المباركية ما لقيتها!
• نبي المباركية القديمة بمبانيها.. بعطرها الخنين.. بملامحها الأصيلة.. وبذكرياتها التي لا تنمحي من أعيننا ووجداننا.
• تفردت المباركية بطابعها الكويتي القديم... التصميم الجديد جميل لكن القديم أجمل.
• إلا المباركية وخروا عنها واتركوها بحالها ما بقى لنا شي من اسم الكويت القديمة إلا المباركية والأبراج.
• التصميم ما له علاقة بالتراث القديم احنا نحب المباركية لأنها تذكرنا بالماضي الجميل وهذا التصميم بعيد كل البعد عن تراثنا وكل شي قديم.
• لابد أن يعي المسؤولون أن مفهوم «تطوير سوق المباركية» يقتصر على الخدمات والمرافق بالسوق من دون «المساس» بهوية السوق التراثية الشعبية البسيطة.
• هذا «تشويه» وليس تطوير.
• المتنفس الوحيد من الزمن الجميل بيعدمونه!
• أنا مو ضد التطور لكن المباركية «تراث» وحلاته بأجوائه وبساطته.
• جميع دول العالم حتى أوروبا فيها أسواق تراثية قديمة، وحكومتنا ذابحها التطور الجديد... تبي تنسف تاريخ سوق المباركية
• الكل مستغرب من هذه التصاميم البعيدة كل البعد عن الخط والتصميم التراثي لمنطقة المباركية.
• المباركية إرث تاريخي لا يمكن نفرط فيه.
• والله سوق المباركية حلاته يتم على حاله، بس يبيله تنظيم حسب مواصفات أكثر أماناً.
• المحافظة على معالم التراث واجب وطني ومنها سوق المباركية.
• أصلاً جمال المباركية بشكله القديم... إحنا الحين ننحاش من الأماكن الحديثة عشان نتمتع بالسوق القديم وهذا اللي باقيلنا... إذا تبون تطورون خلوه بمكان قريب منه لكن تغيرون شكله؟ لا ما نبي... شلون الأجيال القادمة يعرفون سوق أجدادهم القديم؟
• لا حول ولا قوة إلا بالله خلصتوا على جميع الأماكن التراثية والسياحية والترفيهية عندنا وبتلحقون على المباركية!
• أول سوو فيلجا ولا أقولك المدينة الترفيهية ولا أقولك حديقة الشعب ولا أقولك سو اللي هدمتوه بعدين تعالوا عدّلوا المباركية.
• سوق المباركية سوق تراثي يحرص السياح والمواطنون والمقيمون على زيارته، وما يتم تسويقه هو هدم لهذا التراث ومسحه وليس تطويره.
• ما كفاكم المدينة الترفيهية شوفوا لكم منطقة نائية محتاجة تطور عمّروا فيها... وخلوا المباركية لنا.
• أصلاً حلات المباركية بشكلها القديم وتراثها القديم... والتحديث والتطور غلط في غلط... واللي يبي التطور والكشخة يروح مكان ثاني.
• في حين أن الجهود موضع تقدير كبير، لكنني لن أسمي هذا ترميماً أو تجديداً. هذا محو كامل للمرجع الثقافي وراء سوق المباركية وكل ما يمثله على الإطلاق. فن التجديد هو الحفظ - وليس بالضرورة بالمعنى الحرفي، في بعض الأحيان يكون مجازياً أو تمثيلياً - ولا يحتوي هذا التصميم على أي منهما.
• هذا المشروع جريمة وليس إنجازاً... من المفروض الحفاظ على أصالة سوق المباركية كأحد أهم المعالم التاريخية في الكويت،
ويمكنهم عمل مشروعهم العصري المقترح في أي مكان آخر.
• ممكن تشيلون إيدكم من سوق المباركية وتحافظون عليه مثل ما هو؟ هذا كنز حقيقي، والعبث فيه جريمة تاريخية
• تصميم جميل لكن وحده لا يكفي... حيث يحتاج مهنية عالية في إعادة السوق إلى ما يقترب من شكله القديم، والأخذ بعين الاعتبار هوية الكويت القديمة وعبق الماضي بكل تفاصيله الجميلة من الثراث القديم والبيئة الكويتية الأصيلة.
• لهالدرجة متبرين من تاريخكم؟ ليش هالتصميم؟ مكان مثل هذا ما يحتاج شركة عالمية وتفلسف!
• عندنا مصممين ومصممات يخرعون ولازم تعطونهم الفرصة وتستندون عليهم بأي تصميم. ويكفي أنهم يعرفون بيئتنا وخصوصية المباركية، واللي بهالصور خلوه لمكان ثاني أو لتوسعة مستقبلية. بس الأساس حافظوا عليه.
