أبسـألـك

صبرت واشوف الصبر مايبيني
كن الصبر ينطق علامك ترديت
إليا متى والشك بينك وبيني
إليا متى تخطي ولا كنك اخطيت
إليا متى وادمح خطاك بحنيني
إليا متى وإليا متى والله ازريت
ماعاد تفرق لو تروح وتجيني
عندي تساوت يوم شفتك تماديت
ضيعت وقتي معك واجمل سنيني
في ذمتي غلطة وعنها تنحيت
مافادني كثر العذر ياضنيني
ياما على شانك سكت وتغاضيت
مافادني شعري ومدت يميني
اخلصت لك واعطيت ماكني اعطيت
كله على الفاضي شقاي وونيني
وانته ولا مرة عطيت وتعنيت
وش عاد ياعشقي ودمعات عيني
دموعي اللي تنحدر لاتباطيت
ماراح اقول الدين ديني وديني
الدين ديانة تربى على الصيت
خلاص روح ارجوك لاتحتريني
واشره علي لو صوب دارك تمشيت
ان جيت وإلاْ رحت رافع جبيني
ماقد نطقت الاه او قلت ياليت
الذنب ذنبي والخطأ محتويني
انا اعترف يومي لمثلك تهاديت
روح وتوكل لا اجيك وتجيني
الحي مهما صاح مايرجع الميت
ابسالك بالله بينك وبيني
وش مستفيد الحين يومك تسليت
| شعر: حمد هادي بن شريم|