عروق المحبة

من باع قلبي والغلا ما رجيته
نفسي من العفة بعيدٍ مداها
‏مطلع جميل لنص أكثر إشراقا وتميزا جادت به قريحة الشاعرة سميرة العتيبي وأهدته إلى قراء «مواسم»:

من باع قلبي والغلا ما رجيته
‏نفسي من العفة بعيدٍ مداها
‏واللي يحسب إني اليا غاب جيته
‏كلٍ بخيص بنيته لا نواها
‏اللي يبيني كل عمري عطيته
‏ومن صد عني شرهتي ماخذاها
‏لاجفت عروق المحبة سقيته
‏وعروق قلبي مالقت من سقاها
‏أكضم وأقدم طيبي اللي بديته
‏من صفحة كتابٍ كذا محتواها
‏عامل تُعامل هكذا اللي قريته
‏إلا هل الصدات ما أطلب رضاها
‏يا اللي تدور كان طيفي لقيته
‏لا تعتذر وجروحي القا دواها
‏قلبي تغير ماهو اللي هويته
‏لو كان نبضاته يجي لك صداها
‏حكيي فعل والله لامن حكيته
‏ولا أحدٍ يقول بهيبتي وش وراها
‏من عز أبوي العز كله خذيته
‏متوارثه طيب العلوم وحلاها
‏من عفتي جف الخفوق ومليته
‏وأقفيت عن ناسٍ عطتني قفاها