رمز العدالة

بـ أشواق غربية وبحروف من نور

نرسم خريطة للكويت الجميله

خريطة الوحدة بـ احاسيس و شعور

اللي تجسّد واجبات الفضيله

عند الافاضل حب الاوطان مشهور

يفوق حب الطايفة والقبيله

واهل الكويت اخلاصهم طور عن طور

للدار في كل الدروب الطويله

سنه وشيعه للوطن دورهم دور

تميّزوا بالتضحيات الجليله

ما في طابورين بالفعل طابور

والتفرقه ما بينهم مستحيله

يعجز يفرّقهم مخرّب و مغرور

يتعب ولا ينجح وينهد حيله

اهل الوفى الصادق من عصور لعصور

وافعالهم يوم الشدايد جزيله

يبقى تلاحمهم معزّز ومعموره

ثقيل في وجه الرياح الثقيله

يحكمهم الدستور يا حي دستور

جميع مطلب للمواطن كفيله

حق المواطن ما يجي فيه مبتور

يجيه كامل ما يعرقل سبيله

ويبقى العلم في وحدة الشعب منشور

من العبدلي للسالمي للمسيله

في ظل اميرٍ ما ظلم كل مامور

هم الوطن بين الضماير يشيله

منْه الكرم وردٍ على الشعب منثور

يسلم وتفداه اليدين البخيله

رمز العداله يرفض الظلم والجور

في عهده انجازات ما هي قليله

صباح ابو ناصر له الشكر موفور

ما ياجد الشعب الكويتي مثيله

ويسلم ولي العهد وافي ومشكور

امتاز بـ اخلاق الرجال النبيله

الساعد الايمن وله جهد منظور

نواف ابو فيصل كريم الخصيله