بيارق المجد?

يوم الطواريق ودنّي و جابنّي

ناديت وين القصيد وهاجت بحوره

يا كويت ابسمعك من شعري و فنّي

بـ اقطف لك من الشعر و أهدي لك زهوره

يا كويت وشلون ما اكتب فيك وأغنّي

و أنت حديث القصيد و ذوق جمهوره

أقسم لك بـ ربي اني من صغر سنّي

فتـّحت عيني عليك و شفتك إسطوره

أسكنك و أدري غلاك العذب يسكنّي

كـ أني الصوت و أنتي كنّك الصوره

أجول بين الدول و أغيب لكنّي

أرجع لك العاشق اللي يصدق شعوره

انزل مطارك و أدور من الوله كنّي

أشارك المغترب و أقاسمه دوره

جيتك من آخر حدود الشوق متعنّي

أعكس لك احساس شعب ٍ ما طفى نوره

ما يختلف ظنك و ما يختلف ظنّي

بيارق المجد مركوزه و منصوره

قيادتك عادله و الشعب متهنّي

عرفتي ليه العرب سموك مغروره

و الشر ما ياصلك لو يركبه جنّي

حاميك ربي من الشيطان و شروره

ياكويت أبقول كلمه و إسمعي منّي

أنتي حديث القصيد و ذوق جمهوره