المجاهيم

لكل زمن دولة ورجال... بهذه المقولة نستقبل نصاً من شاعر يتواصل معنا دائماً بكل ما هو جديد، الردعان يصافحكم بهذا النص:

لا والله الا روّحن المجاهيم

افقن بهن جرد السنين العجافي

امنول ارقا الرجم واخايل الريم

واليوم اناظر له واعود اخلافي

جا للزمن حدر المحاجر تعاليم

وثقلت اخطانا عقب ماهن خفافي

ولو ناض براق المزون المعاتيم

ما عاد لي يم البروق انعطافي

وامالنا راحت كما شرد الغيم

اليا قفتهن من تثير السوافي

دنيا تحدانا بكل المفاهيم

ما فرقت بين الردي والسنافي

من لا فهمها ضاع بالسين والجيم

وايامها لو اقبلت لك مقافي

اعمل بها لكن لها خلك فهيم

من قبل لا تعمل عليك التفافي

كمٍ من عزيزٍ شاف في عينه الضيم

وكم قدرت بالناس واطي وهافي

لا تخدعك في بعض الاحوال وتهيم

في عالمٍ ما ينعرف له مرافي

لو طال عمرك لا تحسب انك مقيم

لابد لك عن هالحياه انصرافي

اقنع وخلك فالعرب طيب الخيم

واحذر تنرفزك العقول الضعافي

ولا تخاوي من يحسب الملاليم

واحرس على الطيب ولو كان حافي

ولا تجرح السايل ولا تنهر ايتيم

والزله اللي ماتضرك عوافي

وهرجٍ يزيد ابعض الاوضاع تأزيم

خله ودوّر ما يحل الخلافي

مهما وصلت لعلم تحتاج تعليم

والتجربه تحسب بعلمٍ اضافي

هذا ولا للعبد غير المقاسيم

لو شد حيله في جميع احترافي

لكن عسى الله يرحم الحال ويديم

خيره وجعل الخير وافي وظافي

وانه يوفقنا بحسن الخواتيم

في ساعة مامن عوينٍ ورافي

وصلوا على محمد صلاة وتسليم

رسولنا اللي ماعليه اختلافي

| سعود الردعان الهاجري |