تنفس الصعداء

| غازي بن مشعل |
تنفس الصعداء يا منبع الياس
يالناطق الرسمي عن أهل التعاسه
ما تنتمي لناس واتهمك الناس
تبطن حزن واحساس بوحك أناسه
حساس واللي ينقلك كان حساس
ما باح لك خايف يزيدك عماسه
تشفق عليك العين عن شوف الأنجاس
اتدس ما شافته عنك ادساسه
يا قلبي اللي يطرقك كل عساس
من وسع جلبك صرت مرتع عساسه
يجوبك اللي من شقى الوقت منحاس
يعطيك همه وانت تعطيه ماسه
عد المثايل حيثك اتصنف أجناس
ولي عقل فالشعر ياقو باسه
أغوص بحرن تنقطع فيه الأنفاس
قسته وغيري عاجزن عن قياسه
جساس نبض الناس عساس غطاس
فني خطابه مندمج بالسياسه
مفصوم شخصية شعر مالي اقياس
ملهم شعر ما وحيتبه بالدراسه
مفلس ردى دقق على كلمت إفلاس
غنى إذا حي الغنى بالفلاسه
دقق على كلمت عنى بين الأقواس
معنى غنى أفقر حصيل النجاسه
في نظرتي من يحسب العلم كراس
غبي لأن ما فيه علم بأساسه
لومو نيوتن مكتشف قوة الباس
فالجاذبيه بقتناء وحداسه
كان اكتشفناها بلى درس وإعماس
أمرن ضروري ما يبيله فراسه
سحبان بن وايل وباقل ونواس
والأكثم الصيفي وربعه وناسه
لولا انحطاط المعنويات فالناس
ولا توارثنا الأدب بالرأسه
وقت الفراغ أحيان يجعلك نبراس
لاكن فراغ الوقت ساس المحاسه
أوقات وقتك عدها عد الألماس
اغرس بوقتك طيب تجني غراسه
العجز من قوة تذلل بأدناس
والقوة ابتعجيز فوز بشراسه
من داس ما ينداس لو داس له راس
شيخن لك الله ما حدن داس راسه
والحبر والقرطاس والجوخ والطاس
كانت لبوالطيب هوان وخساسه
الفكر إذا ما يخلصه طيش وسواس
ايعيش عمره مرتزق الاقتباسه
ومن كان همه يجمع المال بكياس
همي شلون أعلي الانتكاسه
والحب إذا ما هو لبو خد مياس
ضيعت هوا خلف الخزا والطماسه
واوجد حالي ياملا وجد بودباس
على وليفن ما سمع إلا حساسه
يصرخ من المنفى وأنا فيه مهواس
وكل ما بعد عني تزيد الهواسه
بيني وبينه باب مقفل وحراس
وأهله عليه مشددين الحراسه
ما به شبر إلا عليه القدم داس
واتخيل إن خلي برجليه داسه
أفضل من اللي بالهوا يطبخ الفاس
وماله مسمى غير طباخ فاسه
نهاية المشوار يا ضحك يا ياس
فكر بعقل وتبتكر في سلاسه
هل يستوي المخنز معي حامل الآس
قل يستوون إليا عفن ريح آسه
الليل يسلخ منه النور بقياس
والنور ما به ليل يسلخ لباسه