قالوا غني

شاعر نظم ومحاورة شاعر من كبار الشعراء يعجز التعبير عن ذكر مزاياه يجيد الشعر بكل ثقة يحرص كل الحرص على معنى ابياته في النظم او المحاورة، انه ذيب الشمري اخترنا هذه الرائعة من روائعه...

مضمون ثاني بيت عندي من سنين

صايب وماضفنا على البيت صايب

قالوا غني قلت اعترف ماعلي دين

قالوا لك اعداء قلت عندي قرايـب

قالوا عسى بالمجتمع منصبك زين

قلت احترام الناس حاضر وغايـب

الله مسخر لي قلـوب السلاطيـن

مارحت في حاجه ورديـت خايـب

والله ما احسد جامعيـن الملاييـن

واهل المناصب حامليـن الحقايـب

باليوم لافرجّـت كربـه لمسكيـن

اخير من منصـب وزيـرٍ ونايـب

مابي مقابلها من النـاس هالحيـن

ابغى ليا حطّـت علـي النصايـب

اجني ثمرها يوم وضع الموازيـن

لاسيقْت الارواح سـوق الجلايـب

ارجي مقابلهـا قصـور وبساتيـن

وحورٍ تباهى في جمـال العجايـب

لاتنتظر ياتي لـك الاجـر بعديـن

ياللي على المسكين تاخذ ضرايـب

الطيب ماياتـي مقايـض وتدويـن

ولاينبغـي طيـبٍ وراه الطلايـب

واعمالنا واحد على واحـد اثنيـن

مفهوم ماتدخـل عليـه الشوايـب

شيء لوجه الله على الراس والعين

وهذا الذي تتعب عليـه الركايـب

وشيء لعبـدالله طليـق الحجاجيـن

والثالثـ اللـي بينهـم للهبايـب

واذا القيّم ضاعت تضيع القوانيـن

وتستفحل امراض الفتن والمصايب

مافيه علـم الا ويحتـاج تمريـن

من شان مايبقى معطـل وسايـب

والبعض يرعى العلم رعي البعارين

ومداركه مثـل البيـوت الخرايـب

يدرس علومٍ في جميـع المياديـن

ويبقى على التطبيق عاجز وهايب

شعر: ذيب الشمري