شعبان عالحديدة...!!

تعمل ايه لو مرة كدة صحيت الصبح ولقيت نفسك مهموم... وتلاقي حاجة كدة بتخلي نفسك مكتوم... وان حاولت تقاوح او تعارض تلقيك في قفة ملموم... وان حاولت تعرف ليه بتلاقي الصدر مكلوم... وان عرفت الحقيقة حتكون بالواقع مصدوم... ما فيش غير انك تلبس طرحة وتدعي ربك يفرج الهموم... اكيد انت عارف نفسك واكيد للامن معلوم... علشان كدة فتح عنيك وبلاش تكون ملخوم... وسلم امرك لله دي عمرها ما دامت دوم...!! ولو سمحت قولي... تعمل ايه لو انت ماشي مرة ومش واخد بالك... وفجأة لقيت ملاك ابيض بنجوم على كتافه قدامك...!! وبيخبط ع قزاز عربيتك ويصحيك من احلى جو... قاعد مشغل التكييف وبتسمع فيروز بصيت لقيت العوّ... انتبه يا مواطن ايه اللي عندنا جابك... وليه شكلك مبسوط وليه مش رابط حزامك...؟؟ وليه كده متفائل وليه الهم مش راكبك وصابك... اكيد عميل مأجور وليه تبقى كده وايه نابك... تتبرجل فجأة في الكلام... وتحاول تبدأ بالسلام... تلاقيك ممنوع من التعبير... وان حاولت تشرح ظروفك حيقولوا مواطن غلباوي فقير... ويشوفوك عالجهاز ويكتبوا فيك تقرير... واستنى قبل ما تدفع للحزام غرامة يمكن تطلع خطير... بتمشي عند الحيط هناك جنب الطراطير... وبتصرف تموين البطاقة ببجاحه وتتنطط في الطوابير... كهرباء وماء وصرف صحي... كل ده بتدفعه يا اخي وجعت مخي... وكمان كل يوم بتروح تشتكي في عيادات التأمين الصحي... انت ليه يا اخي بصحتك مش قادر تضحي... واستني يمكن تكون مغير اسمك كما من شعبان لفتحي... احنا عارفين الالاعيب ديه... وعلينا ما فيش حاجه مستخبية... هي ليه النفوس ما تبقاش كده مطيعة ومستحية... مش لازم تلتزم بالقانون الجديد... خلاص بقيت فتوه وبتفوت في الحديد...!! مش لازم تعرف اللي مش من حقك واللي عليك... وان مافيش حاجة بتاعتك وأي قانون مش ليك... اربط الحزام يا مواطن واعرف اللي عليك... وبلاش تقعد في عربيتك براحتك ده ناقص تدلدل رجليك... ودعبس كده شويه في جيوبك... وشخلل كده وسمعني حلاوة فلوسك ... وكله يا مواطن بالقانون ... علشان ما يعترضش علينا اي مجنون... او واحد عنده كلمتين وبقلمه مفتون... ادفع نص الغرامة ويا ريت تكون ممنون... وبعدين عاوزينك بقي تبتسم للكاميرا وتضحك في الصورة... وتقول رأيك بقى في احدث قوانين المعمورة... ايه رأيك بقى وبأمانة في قانون المرور... بس لو سمحت علشان تجاوب حط على راسك طرطور... لكن بعد ما دفعت الغرامة عاوزين نعرف ليه مش رابط الحزام... اكيد انت مشاكس ومش حتبطل كلام... انت اكيد كمان مش بتربط الحزام في حياتك... ولا بنتظر حولك لغاية ما الهم صابك... واكيد بتفكر ازاي حتستقبل رمضان... وحتصرف منين... باقي الشهر والاسعار جنان... والمدارس يا حلو اهي جايالك هي كمان... والعيد انسي ايامه واياك تكون فرحان... شعبان فتح بقه وسأل هو فيه ايه يا بيه... كل ده علشان الحزام هو انت تقصد ايه... هو انا سبب كل المشاكل ديه... هو كل اللي حيحصل ده عشان مخالفة مرورية... هو كله عليك عليك وما فيش حاجه ليه!! يا حضرة الضابط عندي لك اقتراح... اكيد حايعجبك ويبقى الكل مرتاح... ويريح بالك كده وتعيش دايما افراح... خد مفاتيح عربيتي... وسيبني ارجع والنبي بيتي... وبس ارجوك حاول تسيب لي الحزام... اخده البيت معايا واربط لساني علشان يبطل كلام... وامسك بيه بطني علشان تصوصو وتجوع في سلام... واحزم بيه وسطي وارقص مع الهوجة والاعلام... وحابطل اروح السيما او اشوف اي قناة افلام... وربنا يخلي قانون المرور اللي آخر تمام... شعبان دفع المخالفة وخد بس الحزام... بعد ما سمع المحاضرة وحلف يسمع الكلام... ويا دوب مشى بسيارته قول عشرة او عشرين متراً كمان... بص لقى حبايبه من زمان... طلع له ملاك ابيض جديد... واقف كده وحاطط نجوم على اكتافه اكيد... اول ما شاف شعبان قال كلبشوا عربيته بالحديد... شعبان قلق وبسرعة قلبه حس... وقال اكيد من بدايته ده يوم نحس... خير يا عم البيه... هو النهارده ايه؟؟ هو قانون المرور ده كله معمول لعربية شعبان بس وعليه... رد الملاك ابو نجوم غالية علشان من حديد... وزعق في شعبان تاني من جديد... هو يا راجل انت ماشي مش واخد بالك ومسطول وماشي كده بنظام وواخد سكتك ع طول... هو انت مش زي الناس بتاكل فول... يعني هو انت عامل لي فيها فايق... ورغم كل اللي بيحصلك مبسوط كدة ورايق... شعبان كان والله ماشي سليم... وراجل منضبط في حياته وحكيم... رجع يسأل هو فيه ايه يا عم البيه...؟ والمخالفة الجديدة علشان عملت ايه...!! والجواب انت ليه يابني مش بتكسر الاشارة...!! وماشي كدة ملتزم بخطوط المرور في الحارة... هو انت فاكر نفسك لسه في البلد راكب حمارة...!! امال مين حيكسر اشارة المرور... ومين حيدفع مخالفة ويكون عليه الدور... ومين اللي حيدفع ويضحك للكاميرا ويلبس الطرطور... ما هو لازم يا بني تكون فيه مخالفة عليك... تمشي عدل او عوج لازم نكتبها ليك... ودي مخالفة عليك والله مش من عندي... دي من القانون الجديد مش اختراع هندي... مخالفة اسمها حسن سلوك والتزام... علشان ما تعملش فيها مثالي وتسمع الكلام... هو انت فاكر ان المخالفات بس حزام... شعبان خلاص مخه طار... نزل من عربيته وهات يا فرار... وقال اسيبها احسن ما ولع فيها نار... ويطلع قانون يعمل لي ضبط او احضار... انا احسن اروح اسوق عربية فاكهة او خضار... القانون الجديد اعلنوا خلاص انه نجح... وان المواطن شعبان ده راجل مشاغب وبجح... واهي دقني لو ساق عربية بعد كدة وفلح... القانون الجدي اكيد عمل في المرور سيولة... ونفض جيوب الناس وخلاها فاضية بسهولة... وحقق للميزانية شوية انتعاشة وسيولة... وادينا في انتظار قانون جديد... يحكم عالناس ببنود من حديد... يحاسبك قد ايه نمت... وليه لما جعت اكلت... واياك تكون بطل وعلى مرتبك اتكلت... ونهارك اسود لو على المدارس قدرت ولحالك عدّلت... واه لو شافوا عندك في رمضان قمر الدين... او شوية مكسرات على كام حبة تين... اطمنك يا عم مكانك اكيد مستشفى المجانين!! بالذمة يا عالم مش دي حاجة تجنن... هو خلاص ما بقاش فيه حد عالقلوب يحن... بلاش كل شوية واحد للقوانين يفنن... والله العظيم... والله العظيم... والله العظيم... الناس بقت عالحديدة...!!