طعم المساء
معك طعم المسا... غير ومعك حتى السوالف غير
معك يا حلو تقليب المواجع بين كفينك
تبختر بين دقات الخفوق ونشوة التفكير
ترى كل الحياة أصغر من اللي بيني وبينك
أحس أنك تجي... والعشب ينبت والطيور تطير
وأحس ان السحاب يلوح براقه على يدينك
أحس بروعة الدنيا وأحس ان الزمان بخير
واحسك للحياة أعذب ندا... ما انتب مثل عينك
أشوف الصبح لاشال الشفق هز الظلام عصير
واشوف الورد يضحك ما بقى إلا ينشدك وينك؟
واشوف الريح تقبل مستخفة دمها وتغير
تنثر لك شعرك... وتنتثر سلة رياحينك
وراما ترقص القمرا بقلب خانه التعبير
مثل ما ترقص الألوان في مسرح فساتينك؟
دخيل أنشودة العشق وذنوب ترفض التكفير
دخيل آخر ربيع مرئي في حضن عشرينك
أنا اللي نزلك من برجك العاجي وجاك يسير
يمد لك اليمين ولا دري عن لهفة يمينك
واثرك تشوفني في حلمك اللي في رجا التفسير
على ذاك الحصان الأبيض اللي في ميادينك
شعرت بطعم سكينك من أول ما بدا التقدير
تمثنيت العروق وقبل اكبر جرح سكينك
لقيتك قبل ما ابحث عنك في الأبراج والتبصير
قريتك قبل اموت بلذة قراية فناجينك
أبي للناس اسولف بك واقول اللي يصير يصير
واحسك سالفه لو سولوفوها شوهوا زينك
حشا لو تطري الفرقا ما اعدك راعي التقصير
عزاي اني ملكت بوقتها عرش اجمل سنينك
يقولون الزمان اغبر وانا اقول الزمان بخير
مادم اللي سكن في ناظرك ما طاح من عينك
ناصر القحطاني
