مشهد...!
يرتسم له دمع عينه ويرجع لعينه يلمه
والضلوع اللي بصدره تقبض القلب وتلوفه
ويبتدي ضيق الشقاوي من عناه وزود همه
ويتسلل عن سماه الين ما يعلن خسوفه
ما تبادى في عيونه كود صوره جات لامه
يومها تبكي وتدعي انها تبغي تشوفه
حطم قيود البلاده وانتثر دمعه بكمه
والدموع اللي انثرتها حطمت بنيان جوفه
صاح بأعلى صوت يمه والندم خيّل وعمه
كفكفي هالدمع يمه ايه أبي عينك تعوفه
ارتعش صوت العجوز وودها قوة تضمه
وسالت دموع المحاجر من نواظرها ذروفه
هزها صوته ونادت يا ظلام الليل سمّه
وابتدى ليله ينادي باسمه وينطق حروفه
اقبل يسابق خطاوي رجله وشوقه يزمه
وارتما بأحضان بحرن من جوانيبه يحوفه
رجعتها ذاكرتها وهي في قوة تشمه
للولادة للرضاعة لي زواجه لي عسوفه
قال يمه ادري اني مخطي وكلي مذمه
والمصيبة حقك أكبر من عذر قلبي وظروفه
يمه الشيطان زين لي دروبن مدلهمه
ضللتني عن هداي وما جنيت إلا الحسوفه
يمه ابدونك حياتي كاس لعنه ذقت سمه
والتوافيق الرديه باتت بدربي امعروفه
كني اللي خان أرض وللوطن مافيه ذمه
يزرع الامن وجنابه ما جنابه كود خوفه
يمه اتعرفين قصة منهو بر امه بهمه
حج بها سبعين حجة وكان مركبها كتوفه
والمصيبة ماوفاها حقها لو باع دمه
عاد انا وشهو بسوي لجل في فعلي اطوفه!!
قاطعت هرجه وقالتله كلامك في متمه
واعطست وأرخت هدبها ودمعها حرك صفوفه
قالت اسلم ما تكلم واندبل للقلب غمه
طالعت له في مكانه بس ما بانت وصوفه
نادته وينك تكلم يا حلو حكي تنمه
لا تخليني وحيده ناظر بحالي وروفه
شوف شيبي فوق راسي يسرق العمر ويدمه
شوف جسمي كيف منهد يعسر أقدامي وقوفه
شف عيوني في غيابك واصله بالشوق قمه
لالفا طاريك يفرح قلبي ويطرق دفوفه
وارجعت نادت تعال وما نطق في شي فمه
ومدت ايديها لدربه علها تلمس كفوفه
ما لقت وسط الغريفه كود سجاده امتمه
وشيله وبرواز لآية كان ثابت وسط طوفه
وانطلق صوت الاذان وأم بالناس الأئمه
والوليد اللي وحشها كان جالس مع هنوفه
اثر لا سالت دموعه لا ولا مبتل كمه
واثر كل ما كان «مشهد» من خيال إم شغوفه
يومها صلت صلاة الصبح والأمطار جمه
تحسبه جالس معاها وأثرها تحكي لطيوفه
