طيب السيرة

سلام ياجابر مبارك عزيز المقام

ياشيخنا طيب السيرة نظيف الضمير

ياطيرنا اللي على روس الشواهيق حام

يفيد ربعه لو أن الصيد ماهو وفير

ماكره من طيب ساسه فوق فوق الغمام

طير السعد وجهه ينومس قبل لا يطير

وافي ياخو مريم ووضعك على مايرام

واللاش يزعل ويرضى والرحى تستدير

نرفع لك البيرق وتبقى لنا كل عام

ياجعل عمرك طويل وجعل خيرك كثير

جابر مبارك حزام اللي ماعنده حزام

ياكثر مافك من محتاج وأغنى فقير

جابر مبارك شبيه البدر وقت الظلام

ينور الكون في ليل الظلام الضرير

أنت السند للضعيف اللي حياته حطام

وأنت الأبو للصغيّر والأخو للكبير

فزعتك للشعب بالأموال والاهتمام

تثبت بإن دمك أميري وفزعتك غير

ياشيخ أنا ما مدح الا اللي عليه الكلام

ولا الردي مامدحه لأن مافيه خير

المجد له ناس تسعاله وترقى السنام

أمجادهم حققوها فوق ظهر البعير

ماتعرف المستحيل وماتحب الحرام

الدين منهاجهم ويصير لو مايصير

الحلم ماحققه راعي هروج وكلام

ماحققه كود من ذاق العنا والمرير

اللي يبي المجد يطويه السهر ماينام

دايم على المركز الأول يحث المسير

أبختصر في قصيدي ياعريب العمام

في بيت في خاطري دايم بأقوله الأخير

المرجلة ماتعوض في كثير السلام

الرجل من غير فزعة رجل مافيه خير