?دمعة الذكرى

ولو ضاقت الدنيا ما راح الأمل بالله

وهو ضيقك اللي صايبك بيده افراجه !!

ولو من يكون الصاحب اللي على طرياه

تهيض وتنطر منه لو ساعة امواجه !!

ولا لك ذرى عن غربي الذكريات الاه

خويك خويك لا اكسرت عينك الحاجه !!

ولو دمعة الذكرى تجيب الرجل واقصاه

توقع لا يكسر لك عصا رجلك ازعاجه !!

ولا تشتكي ضيقك واذا واجهك تنخاه

ولا تتركه من طيحتك يضحك احجاجه

واذا هو عيونه دمعت وامتلت يمناه

تنصاه من بد البشر واشعل سراجه !!

ولا تطلب اليا حل ذكره عليك رضاه

ورب البشر موجود ما خاب محتاجه !!

بسط عرشه وكل البشر لو معاها جاه

تخر له سجد فاسجد لربك وناجه !!

ولا ينكسر من كان له عزوتن تقفاه

واذا احرقه لاهب دنيته كانوا سياجه !!

ولا تستمع في شور من ياكلك بحكاه

وهو ساعة الشدة عزايمه منعاجه !!

فلا تطلبه فزعه وبه واحدن لولاه

تهاوت بك عزومك والاجال دواجه !!

وكن في طريق اللي على الطيبه مسراه

اخذ من تجارب دنيته واعط منهاجه !!

وبفروضك الخمسة تمسك ومن هو تاه

عن افروضه الخمسة فلا طاب مخراجه !!

وزك وتصدق والصيام لهله منجاه...

ولب لعظيم الملك دعوته حجاجه !!

فكم من كسيرن نور الايمان جا واحياه

وخلا البحر تتلاطم اخلافه امواجه !!