ما تقدر النسيان

بحروف يداعبها الشعر العاطفي بكل شموخ وهدوء العاشق وبوح المشاعر هذا ما تعوّدنا عليه من فهيد زيد.

ياللي وردت الما على جالي مثل ورد الحيام

الجال جالك واشرب من الما وهات من العلوم

انا اشهد انه فيك كل اللي يثيـرالاهتمام

وانك بروحك كوم واعذارك بعد فرقاي كوم

قلبك رهيف احساس ما يصبر على طول الهيام

والعذر بلسانك مثل عذر العوايد والسلوم

لي حجم في عينـك ولوصدت ولي عندك مقام

ما تقدر النسيان ياكذاب في ليله ويوم

لكن علشانك معلقني على صدرك وسام

اللي زعل يوم السفر ينسى الزعل يوم القـدوم

والله عليم انك تروح من احترام الى احترام

وان طحت من عيني تطيح من النجوم الى النجوم

العفو ما يقـدر عليه الا الرجاجيل الكرام

وسموحة الخاطر تجي دايـم من صدورالقروم

قل كل مـا يطري على بـالك من اسباب الخصام

واللي جرى في غيبتي من ذكريات ومن هموم

البرد يلمس جسمك الدافي ويحرمك المنام

ما تدري انت تقـوم من مخدعك ولا ما تقوم

روّح معي واسمع لصوتي كل ماقلت الهمام

عجّل تراالفرصة تجي وتروح لكن ما تدوم

ولك مني اني لتركك تلعب على غصن الغرام

وتقول احبك لآخر ايام العمر واقول دوم

الليلة المسرى معك كنه مسيرة نصف عام

يابعد نورالشمس عن جفني وهو مافيه نـوم

غرّد على غصن الهـوى لاضقت مثلي يا حمام

أنا ترا لاضقت غنيت ورقيت أعلى الرجوم

ما تدري ان الحر لاضاقت عليها الارض حام

ولاّ التراب تراب والمرقى على قـدر العزوم

القاع مــا يمشي عليه الاّعصافير ونعام

كان الطيـور اللي لها جنحان ما تقـدر تحوم

لا تزعل ان ما جت لك الدنيا على حسب المرام

يا طير مخلابك يعشــيك اللحم وانت محشوم

الوقت عـوّدني وانا صغيّر على اسلـوب ونظام

اني ما خون بعشرة اصحابي ولا اصاحب رخوم

بسألك يا قلبي بعـــد ما ضقت من كثـر الزحام

اللي بقى لي فيك علم اصحاب ولاّ علم قوم

الحلم مـاعوّد عليك الا بشرهات وملام

والناس مـا تحفظ لك الاسرار يا القلب الكتوم

خلك مثل ماكنت لا يطلع من لسانك كلام

إلاّ الكلام اللي يسد افواههم عند اللزوم

لا رحت بلحالي ما اشوف الا مراويح الغمام

اللي وراها غيوم واللي من تواليها غيوم

واقول في نفسي وانا اشوف الطبيعة يا سلام

صورة من اجمل ما تشوف من الصور على العموم

شعر: فهيد زيد