هي دي مصر... يا هبلة!
شفاك الله يا عم وديع... يا صاحب الصوت البديع... لما غنيت بحب وشجيتنا... وكلامك بقى نشيدنا وغنوتنا... عظيمة يا مصر... يا ارض النعم... يا مهد الحضارة... يا بحر الكرم... عظيمة يا ارض النيل السعيد... اللي كل يوم بيتولد من جديد... واللي بيروي عروقنا بعزم من حديد... عظيمة يا ام النيل الجميل... صاح الحياة والعمر الطويل... ابو الحضارة والهواء العليل... عظيمة يا ارض الحضارات... وتشهد على كده الاهرامات... وابو الهول والمتاحف والاثارات... عظيمة رغم التراب اللي بيرموه عليكي... وخلوا الاقزام ينهشوا فيكي... وكثير متربصين حواليكي... لكن انتي اقوى وابقى بأصالتك... ودايما بالصدارة بانجازاتك ورجالتك... ومهما دار الزمن مش بتغيب ذاكرتك... وذاكرتك هي عمر التاريخ... اللي بيقول ان في البلد دي للعظماء تاريخ... وتشهد على كده كل الامم... واللي بيتمنى فرحتها واللي عاوز يهبط الهمم... ومهما انكروا وغيروا الذمم... هي مصر حتفضل دايما غالية... وفوق رأس العباد رايتها عالية... عظيمة يا ارض المواطن الشريف... اللي بيرضا بعيشته ويعيش عفيف... وان كان هناك مشكلة معيشة او ازمة رغيف... فكله في حب الوطن يهون... وهو قانع ان اللي عاوزه ربنا حيكون... عظيمة يا ارض فيها زويل ومحفوظ... اللي مكانهم في التاريخ محفور ومحفوظ... عظيمة يا مصر مهما زاد حواليكي الضباب... وتطاول عليكي الصغار من كل باب... وحاولوا ينهشوا فيكي مثل الذئاب...!! عظيمة يا مصر بقضائك الرصين... صاحب العدل والحكم الفطين... وصمام الامان ضد اي ظلم مهين... عظيمة يا مصر يا ارض العجائب... واللي فيكي بتحصل كل الغرائب... لكن ده مش وقت اللوم... ومهما حصل منك فده كوم وحبك الف كوم... وحتى لو انحرمنا من اكل الكباب واللحوم... وكملنا عشانا حزمة فجل وفصين توم... وقضينا باقي ليلتنا نوم... حننام برضه وحتجبيلنا في المنام... لان حبك في القلب والعقل من غير كلام... وان كان زماننا ده فيه شوية زكام... وغياب مبادئ كتيرة وشوية ركام... فده مش حيسيب في نفوسنا اليأس او الحطام... وحتعيشي جوانا عالارض وفي الاحلام... عظيمة يا ارض المبادئ والاصل... يا محفورة بالتاريخ في كل فصل... عظيمة يا مصر يا ارض الاجداد... يا صاحبة مقولة «خير الاجناد»... يا صاحبة الكرامة واخلاق الاجياد... يا حكيمة الزمان وخير العباد... عظيمة يا مصر بشعبك العظيم... وجيشك درعك ضد اي عدو لئيم... ومهما كبلوكي بمعاهدة سلام... او زادوا عليكي اللغلط في الكلام... فجندك هو الدرع الهمام... وهو للامة افضل صمام... وهو حامي الديار في الحرب والسلام... عظيمة يا ارض الجود والفول والبقول... واقرأوا كلمات القرآن اللي افضل من اي قول... عظيمة يا ارض المآذن والمساجد... اللي دايما مليانه بكل مؤمن وعابد... واسألوا الازهر الشريف... قبلة الايمان والدين العفيف... اللي بيحمي المبادئ والقيم... ودايما بيرفع في نفوسنا الهمم... عظيمة يا ارض الكنائس والاجراس... ووحدة وطنية ومعدن ألماس... وشيخ وقسيس دايبين في قلوب الناس... مستحيل يفرق بينهم اي حاقد او دساس... عظيمة يا ارض البطولة والشهامة... واللي بيجور عليكي بيحصد الندامة... وحتى لو هناك في الصورة شوية غمامة... حنزيلها وحنورها ونكبرها ونحطها فوق العمامة...!! عظيمة يا ارض العيش الحلال... واللي دم جنودك في سبيل الامة سال... وده جواب اكيد من غير سؤال... واسألوا الجزائر بلد المليون شهيد... اللي دعمك خلاها زي الحديد... واتحررت وكان التحرير والفجر الجديد... واسألوا كمان في اليمن... ومين خلصها من القهر والمحن... وروحوا كمان في السودان... واسألوهم مين لهم صمام الامان... وكمان اسألوا هناك في كل بيت... في الشقيقة المحررة الكويت... حتلاقوا بصمة جنودك هناك أكيد... هوده التضامن الاخوي المفيد... عظيمة يا ارض الكرامة الوطنية... واللي بيتطاول عليكي حيخسر القضية... لان الاصالة فيكي اكيده... وفي انتمائك لامتك دروس مفيدة... عظيمة وكبيرة دايما يا مصر... يا زينة كل زمان وعصر... ومهما الصغار حاولوا يهمشوكي... او يبيعوا قضية ويخونوكي ... فكلنا رايتك وسندك واحنا الدرع لو طعنوكي... عظيمة يا مصر ورب العالمين... اللي خلاكي دار آمن وأمان للقادمين... ألم تقرأوا «ادخولو مصر ان شاء الله آمنين»... عظيمة يا مصر رغم انف الحاقدين... يا ارض الخلود لابد الابدين... هذا شعوري والله شاهد... وبمصريتي انا فخور وحامد... وعلشان يرتاح كل موتور وحاقد... وحتى تهدأ كل نفس لديها قلم او حتى طبلة... اقرئي التاريخ علشان تعرفي ان هي دي مصر... يا هبلة...!
