دمع القصيد و هقوة الهاقي

| تركي عواد | الشاعر العذب تركي عواد، مازال وبكل حب يعيد ترتيب الجمال، مازال يعيد النبض للشعر، مازال يعيد للذائقة رونقها وسحرها.

هنا تركي عواد يعيد ترتيب أرواحنا وأحلامنا وآلامنا والكثير من ذكرياتنا...!

الليل مركب سهر والخوف ياكثره**

لا طال ليل الغياب وضاقت افاقي 

لاقلت ابنساه شفت القلب يفتكره

أنا اعترف مثل قلبه ماني بلاقي

علمني الوقت كل غايب معه عذره 

إلا غيابه سرق من عمري الباقي

لاضج صدر الحنين بصوته وعطره

أدركت هذا البحر كم مشتهي إغراقي

لو يملك الأدمي وقت الجفا صبره

ماشفت صبري يساومني على اخلاقي

أصبحت مثل الذي بيده حفر قبره

لا قادر اشكي ولا اسولف على اوراقي

ماصغّر الوقت بعيوني كبر قدره

رغم انكساري وضيقي داخل اعماقي 

ماخفت طول الوقف وقلت ابنتظره

ماخلق هذا التعب إلا لجل ساقي 

قولوله اللي ستر مسلم كسب أجره

خلوه يرجع ويستر دمعة احداقي 

لايجرح القلب بغيابه ويختبره 

القلب ميت ضما مامرّه الساقي

أصعب من الكذب نسيانه وانا اعتبره

أجمل خطاياي لو ضيّعت عشاقي 

مبطي وانا اسمع من اللي حب مايكره

الين شفته يلمح لي على فراقي

ماكل جرح ٍ  بديك علاجه وستره

يكفيه ماضي وفاي وحاضر اشواقي 

لو كل غالي عرف في غيبته كبره

ماطاح دمع القصيد وهقوة الهاقي





Turkeyawad@