الساحة المغدورة

فلسفة شعرية رائعة تحمل الكثير من الجمل التصويرية والمعنى الآخر لمن يبحث عن الروعة في الشعر لبن سارح**



ياخمسة أعوام الهوى مشكوره

شكرا على الجرح الدفين ودرسي

اخذتني ب اسم الوفا واموره

واعتقت نفسي منك ليلة عرسي

ايه اضحكي للدرب يا مغروره

ليني على كيف امنياتك واقسي

راع الحضور يبين قبل حضوره

وراع الغياب ولو تواجد منسي

بالضبط مثل الساحه المغدوره

عن صوتها يا بعدي ويا خرسي

شعار شاعر صوت شاعر صوره

وشاعر صياح وفيه شاعر نفسي

وشاعر يضيعهم بربع اظفوره

ماهمّه الراضي ولا من حمسي

ان جيتها جيت بيدي بلّوره

وان رحت مايذبل لو ابطي غرسي

مريتي اقلام الشعر مكسوره

حتى استقمتي تحت نغمة جرْسي

ماكنّك الا الحلم بعد الثوره

من يوصل بصوت العرب للكرسي

وصله ولا امدى ينكتب دستوره

عيّا البحر من قو موجه يرسي

قامت عليه العالم المقهوره

روّح مبارك ي الله اخلع مرسي

اسماء تكتب من طرف طبشوره

تصحى الصباح بعزها ما تمسي

هذي الحياه تدور دوره دوره

لو غاب وجه البدر تطلع شمسي

حرّيتي ما تطلب بباكوره

وهدم البيوت الآمنه والرفسي

حريتي في قلب يتبع نوره

في فكرتي في حبري وفي طرسي

اشياء لو زاد الظلوم وجوره

اقدر امارسها وانا في حبسي

يعني لو ان قلبك خدعك بشوره

وافلتك صوب المعمعه من خمسي

ما راح من قلبي كثير شعوره

وما ينقص من ايامي الا رجسي

ليه افترقنا خلها مستوره

ما نفع فيك الصوت ينفع همسي

عادي تكون احلامنا مبتوره

وعادي يكون الغد يشبه لامسي

انا تبعتك والسما ممطوره

تحت الظلام الواقعي والنفسي

ياللاسف ماكنت اشوف الصوره

كنت اتجه قدام وانته عكسي



شعر: أحمد بن سارح