المصري أفندي / الاسماعيلية رايح جاي..!!
| د. سعيد فهمي |
خلاص الحقيقة بدأت تظهر وكل شيء قرب ينكشف ويبان.. بَكَرة الخيط قاعدة بتنسِّل والفضيحة حتبقى صوت وصورة والعالم كله حيعرف المستور رغم انه عارف من زمان.. حقيقة لهط الحكم وسيناريو الفوضى قربنا نعرف مصدره والجاني بقى معروف زي ما قُلنا بالصوت والصورة كمان.. سيناريو الفوضى حنعرف مين اللي كتبه ومين اللي نفذه ومين اللي استفاد منه وده واضح وظاهر واسألوا شهود العيان.. شهود العيان اللي ممنوعين بأداء شهادتهم بطلب من المحكمة لكن تعمل ايه في فلسفة محامي عام واضحه الاتجاه والميول لتنفيذ مخطط غريب يبدو وكأنه صادر من مكتب الارشاد بفرمان.. مؤامرة تركيع الشرطة وحرق المخافر واقتحام السجون وتهريب كل مالذ وطاب من السياسيين والجنائيين والارهابيين من متأسلمين أو اخوان.. الاستعانة بقوة منظمة صاحبة مصلحة وخبرة وعارفة بتعمل ايه بخطة مُحكمة مدروسة ومعجونة ومخبوزة بفعل حثالة من أشباه أبالسة يعجز عنها الجن والجان.. أتارينا أكلنا وبلعنا البلوظة وشربنا الشاي بالياسمين وبلبعنا فياجرا ثورة مغشوشة وصدقنا وكأنه كان فيه هناك ثورة بجد في الميدان.. أتارينا اتنشلنا وانسرق حلمنا مع سبق الاصرار والترصد وصحينا على كابوس غير مسبوق حطم في كل مصري الاحساس بالأمن وبالأمان.. أتاري فيه ناس استغلت سذاجتنا وبراءة تفكيرنا وبلبلت حركتنا وشككت جوانا تصدقينا للراجل أبو دقن بيضا وعامل فيها مؤمن وبيتظاهر علينا بالتقوى والايمان.. كل ده ابتدينا نعرفه ونتابعه في قضية غريبة عجيبة بطلها قاضي نزيه وطني شريف انسان.. الاسم خالد محجوب والمهنة قاضي شريف والمهمة انتحارية والمجني عليه وطن بحاله والجاني مسؤول كبير هارب بفعل فاعل من الليمان.. الاسم خالد محجوب والمهمة كشف المؤامرة والملعوب واجراء كشف هيئه اجباري ومطلوب وكمان كشف عيله علشان مسوغات التعيين طلعت مشبوهة ومحكوم عليها بالتزوير والبُطلان.. الاسم خالد محجوب رجل مش من هذا الزمان واقف لوحده وفاتح صدره بجد وبيقاوم الألاعيب وبيكشف الدهاليز وبيفضح القرداتي والقرد أبو صديري والحاوي والتعبان.. الاسم خالد محجوب والفعل محاولة كتابة التاريخ من جديد واظهار الحق وتغيير اللي بقى علينا مفروض ومكتوب وايه اللي حصل وايه اللي كان.. خالد محجوب مواطن مصري بدرجة مستشار مسك الخيط بيديه وبيحاول يحقق الحلم علشان يظهر الحقيقة لشعب انضحك عليه بالزور والبهتان.. رئيس محكمة الاسماعيلية فتح جُحر التعابين واختار المواجهة بضميره الحيّ أمام جحافل الظلام والجهل والتخلف وكل واحد متغطي بيهم ولكن للأسف المتغطي بيهم زي اللي متغطي بالأمريكان.. قضية هروب المساجين من سجن وادي النطرون قضية كاشفة وواضحة وتفسير للي حصل في هوجة يناير اللي افتكرناها ثورة لكن مين قال ان ثورة تخلي بين يوم وليلة المساجين يبقوا هم في الحكم والثمن حيدفعه شعب عايش مخدوع مغبون من وراء القضبان.. خالد محجوب نموذج من الزمن الجميل ونسخة أصلية من الضمير القضائي اللي بنشوف بعيوننا كل مخططات تهميشه من منظومة الغربان.. نداء من كل مصري شريف وكل من يملك أي دليل في مأساة هروب السادة المساجين من سجن وادي النطرون أن يسرعوا بتوثيق شهادتهم لاظهار حقيقة الجاني والشريك في قضية العصر المصرية ومعرفة سر كل متآمر هربان.. الشعب اللي يرضى بالسكوت والخنوع عن حقيقه حكامه يستاهل يحكمه ألف فرعون وهامان..!! قضية هروب المساجين من السجون وبالذات وادي النطرون فرع من فروع مؤامرة اكتملت فصولها بذبح 16 شهيداً من أبنائنا خير جند الله من القوات المسلحة المصرية.. البلد بقت سداح مداح وكأنها من غير صاحب والمخطط واضح ومبرمج لتفكيكها وزرع الفوضى فيها لسيطرة فصيل التأسلم والمنظمات المسماه بالجهادية.. المشهد واضح والدليل سينا واللي بيحصل فيها من بلبلة وصراع مقصود ومشبوه لزرع الارهاب في أرض الفيروز المصرية.. المشهد واضح وظاهر للتخاذل عن عمد والدليل تهديد محكمة محاكمة الهروب الكبير في السجون وقتل الجنود في رمضان وخطف ضباط الشرطة الى غزة والصمت الرهيب لغز محتاج للتفسير والتبرير للمهزلة الأمنية.. السكوت والصمت من كل مسؤول على كل الأحداث بداية من اللعب في الصناديق للتهديد بحرق البلد حتى التزوير في المطابع الأميرية.. نظرية اخبط دماغك في الحيط وقول وهلل زي ما انت عاوز واحنا حنحقق مخططنا زي ما احنا عاوزين وهي دي النظرية.. قوم واتظاهر وكسر واحرق واكتب شكاوي وافضح بلاوي مش مهم كله في الأدراج ويبقى الحال كما هو عليه وعلى الشعوب اللجوء للقضاء أو الاعتراض على القنوات الفضائية.. فيه حاجة غلط وفيه ريحة وحشة وفيه طبخة حمضانة مش عارف بين مين ومين رغم ان الصفقة معروفة لكن الحظر موجود لاعتبارات أمنية.. العملية مش محتاجة تفسير أو تعليل لكن مهما كانت الصفقة فهناك شعب يستغيث يوميا بمنقذ مسؤول أدبيا ودستوريا وأخلاقيا عن أمنه وأمانه وده حكم فرض مش مسألة تخضع لحسابات السياسة ولا هي مسألة مزاجية.. الأب الروحي للبلد دي عارفة هي مين وعارفة دورها ويا خوفي يموت الشعب تحت شعار المهم تنجح العملية السياسية.. فيه تعابين جوه وبره والدليل العرض العسكري للارهابيين في سينا أخيرا وأفاعي الأنفاق وحج قادة حماس لدار المرشد وكأنه تصريح صريح بمعرفتهم بصاحب القرار في منظومة الحكم المصرية.. محكمة الاسماعيلية وقاضيها بداية الأمل ولازم الكل يتابع ويساند مع كل وطني شريف خطوات القضية.. طريق الميل يبدأ بخالد محجوب القاضي الشريف وربنا يستر عليه من منظومة بتصدق نفسها وتتخيَّل أنها جاءت بالصندوق والشرعية.. مش قالوا يا ما في الجراب يا حاوي والقرد لو مات القرداتي حيشتغل ايه؟؟ بسيطة حيرجع مكانه تاني وتنور بلدنا تاني وتتمتع بالحرية.. مخطط الهروب الكبير من السجون وقاتل ولادنا في سينا ومزور أوراق الانتخابات هم دول الـ3 صوابع اللي بيلعبوا في البلد وحينقطعوا عن قريب والبداية من الاسماعيلية.. صدقوني والله العظيم البداية والنهاية من هناك يعني اسماعيليه رايح جاي وهي دي القضية.. أي والله هي دي القضية..!!
[email protected]
خلاص الحقيقة بدأت تظهر وكل شيء قرب ينكشف ويبان.. بَكَرة الخيط قاعدة بتنسِّل والفضيحة حتبقى صوت وصورة والعالم كله حيعرف المستور رغم انه عارف من زمان.. حقيقة لهط الحكم وسيناريو الفوضى قربنا نعرف مصدره والجاني بقى معروف زي ما قُلنا بالصوت والصورة كمان.. سيناريو الفوضى حنعرف مين اللي كتبه ومين اللي نفذه ومين اللي استفاد منه وده واضح وظاهر واسألوا شهود العيان.. شهود العيان اللي ممنوعين بأداء شهادتهم بطلب من المحكمة لكن تعمل ايه في فلسفة محامي عام واضحه الاتجاه والميول لتنفيذ مخطط غريب يبدو وكأنه صادر من مكتب الارشاد بفرمان.. مؤامرة تركيع الشرطة وحرق المخافر واقتحام السجون وتهريب كل مالذ وطاب من السياسيين والجنائيين والارهابيين من متأسلمين أو اخوان.. الاستعانة بقوة منظمة صاحبة مصلحة وخبرة وعارفة بتعمل ايه بخطة مُحكمة مدروسة ومعجونة ومخبوزة بفعل حثالة من أشباه أبالسة يعجز عنها الجن والجان.. أتارينا أكلنا وبلعنا البلوظة وشربنا الشاي بالياسمين وبلبعنا فياجرا ثورة مغشوشة وصدقنا وكأنه كان فيه هناك ثورة بجد في الميدان.. أتارينا اتنشلنا وانسرق حلمنا مع سبق الاصرار والترصد وصحينا على كابوس غير مسبوق حطم في كل مصري الاحساس بالأمن وبالأمان.. أتاري فيه ناس استغلت سذاجتنا وبراءة تفكيرنا وبلبلت حركتنا وشككت جوانا تصدقينا للراجل أبو دقن بيضا وعامل فيها مؤمن وبيتظاهر علينا بالتقوى والايمان.. كل ده ابتدينا نعرفه ونتابعه في قضية غريبة عجيبة بطلها قاضي نزيه وطني شريف انسان.. الاسم خالد محجوب والمهنة قاضي شريف والمهمة انتحارية والمجني عليه وطن بحاله والجاني مسؤول كبير هارب بفعل فاعل من الليمان.. الاسم خالد محجوب والمهمة كشف المؤامرة والملعوب واجراء كشف هيئه اجباري ومطلوب وكمان كشف عيله علشان مسوغات التعيين طلعت مشبوهة ومحكوم عليها بالتزوير والبُطلان.. الاسم خالد محجوب رجل مش من هذا الزمان واقف لوحده وفاتح صدره بجد وبيقاوم الألاعيب وبيكشف الدهاليز وبيفضح القرداتي والقرد أبو صديري والحاوي والتعبان.. الاسم خالد محجوب والفعل محاولة كتابة التاريخ من جديد واظهار الحق وتغيير اللي بقى علينا مفروض ومكتوب وايه اللي حصل وايه اللي كان.. خالد محجوب مواطن مصري بدرجة مستشار مسك الخيط بيديه وبيحاول يحقق الحلم علشان يظهر الحقيقة لشعب انضحك عليه بالزور والبهتان.. رئيس محكمة الاسماعيلية فتح جُحر التعابين واختار المواجهة بضميره الحيّ أمام جحافل الظلام والجهل والتخلف وكل واحد متغطي بيهم ولكن للأسف المتغطي بيهم زي اللي متغطي بالأمريكان.. قضية هروب المساجين من سجن وادي النطرون قضية كاشفة وواضحة وتفسير للي حصل في هوجة يناير اللي افتكرناها ثورة لكن مين قال ان ثورة تخلي بين يوم وليلة المساجين يبقوا هم في الحكم والثمن حيدفعه شعب عايش مخدوع مغبون من وراء القضبان.. خالد محجوب نموذج من الزمن الجميل ونسخة أصلية من الضمير القضائي اللي بنشوف بعيوننا كل مخططات تهميشه من منظومة الغربان.. نداء من كل مصري شريف وكل من يملك أي دليل في مأساة هروب السادة المساجين من سجن وادي النطرون أن يسرعوا بتوثيق شهادتهم لاظهار حقيقة الجاني والشريك في قضية العصر المصرية ومعرفة سر كل متآمر هربان.. الشعب اللي يرضى بالسكوت والخنوع عن حقيقه حكامه يستاهل يحكمه ألف فرعون وهامان..!! قضية هروب المساجين من السجون وبالذات وادي النطرون فرع من فروع مؤامرة اكتملت فصولها بذبح 16 شهيداً من أبنائنا خير جند الله من القوات المسلحة المصرية.. البلد بقت سداح مداح وكأنها من غير صاحب والمخطط واضح ومبرمج لتفكيكها وزرع الفوضى فيها لسيطرة فصيل التأسلم والمنظمات المسماه بالجهادية.. المشهد واضح والدليل سينا واللي بيحصل فيها من بلبلة وصراع مقصود ومشبوه لزرع الارهاب في أرض الفيروز المصرية.. المشهد واضح وظاهر للتخاذل عن عمد والدليل تهديد محكمة محاكمة الهروب الكبير في السجون وقتل الجنود في رمضان وخطف ضباط الشرطة الى غزة والصمت الرهيب لغز محتاج للتفسير والتبرير للمهزلة الأمنية.. السكوت والصمت من كل مسؤول على كل الأحداث بداية من اللعب في الصناديق للتهديد بحرق البلد حتى التزوير في المطابع الأميرية.. نظرية اخبط دماغك في الحيط وقول وهلل زي ما انت عاوز واحنا حنحقق مخططنا زي ما احنا عاوزين وهي دي النظرية.. قوم واتظاهر وكسر واحرق واكتب شكاوي وافضح بلاوي مش مهم كله في الأدراج ويبقى الحال كما هو عليه وعلى الشعوب اللجوء للقضاء أو الاعتراض على القنوات الفضائية.. فيه حاجة غلط وفيه ريحة وحشة وفيه طبخة حمضانة مش عارف بين مين ومين رغم ان الصفقة معروفة لكن الحظر موجود لاعتبارات أمنية.. العملية مش محتاجة تفسير أو تعليل لكن مهما كانت الصفقة فهناك شعب يستغيث يوميا بمنقذ مسؤول أدبيا ودستوريا وأخلاقيا عن أمنه وأمانه وده حكم فرض مش مسألة تخضع لحسابات السياسة ولا هي مسألة مزاجية.. الأب الروحي للبلد دي عارفة هي مين وعارفة دورها ويا خوفي يموت الشعب تحت شعار المهم تنجح العملية السياسية.. فيه تعابين جوه وبره والدليل العرض العسكري للارهابيين في سينا أخيرا وأفاعي الأنفاق وحج قادة حماس لدار المرشد وكأنه تصريح صريح بمعرفتهم بصاحب القرار في منظومة الحكم المصرية.. محكمة الاسماعيلية وقاضيها بداية الأمل ولازم الكل يتابع ويساند مع كل وطني شريف خطوات القضية.. طريق الميل يبدأ بخالد محجوب القاضي الشريف وربنا يستر عليه من منظومة بتصدق نفسها وتتخيَّل أنها جاءت بالصندوق والشرعية.. مش قالوا يا ما في الجراب يا حاوي والقرد لو مات القرداتي حيشتغل ايه؟؟ بسيطة حيرجع مكانه تاني وتنور بلدنا تاني وتتمتع بالحرية.. مخطط الهروب الكبير من السجون وقاتل ولادنا في سينا ومزور أوراق الانتخابات هم دول الـ3 صوابع اللي بيلعبوا في البلد وحينقطعوا عن قريب والبداية من الاسماعيلية.. صدقوني والله العظيم البداية والنهاية من هناك يعني اسماعيليه رايح جاي وهي دي القضية.. أي والله هي دي القضية..!!
[email protected]
