وقفة شعر مختصرة

المعروف

قبل تشكرني الى جيتك على ميعادي

اعرف ان الحر مثلي ما يعرف الذله

ما علي من العيون اللي تقيس أبعادي

تلتفت لأدناي ولا أقصاي ما توصل له

سامعٍ لي من ورا النسيان صوت منادي

و ابرك المعروف معروف يجي في حله



فهيد زيد



بنت الجمال

العام طلعي بعيد وعظم ساقي حديد

واليوم ماني على خبرك ولاني فرج

من ذاق ما ذقت من فيض الغرام الرغيد

ما سج عن لذته لو عن حياته يسج

بنت الجمال الغني واخت الغرور الشديد

كم جمعت لي ذنوب وسببت لي حرج



فرج بوعوينة



يالحلا

بك زين من راسك يلين إبهامك

اللّيل ياخذ من صباحك ضوّه

ما يحجب الوجه الصّبوح إلثامك

طلّتك دايم يالحلا محلوّه

ماكنّك تدوس الثّرى بأقدامك

كن الثّرى تحتك يصير مموّه



علي سالم الكعبي



داخل القلب

اثبـت لـي انـك مغـرمٍ فـيّ هايـم

واثبت لك انـي هايـم فيـك مجنـون

يـا واحـد ذكـرك وطاريـك دايـم

لك منزل في داخـل القلـب مضمـون

مـا غيـروه اهـل الحكـي والنمايـم

اللي على تفريـق الاحبـاب يسعـون



عبدالله السلوم