المسافة والغياب

الناس تخطي ما يهم... امسحها في وجه التراب

بس البلا وشلون اعدي كأنها جت من صديق!

ما للخطا عذر كريم ان وصلت حد العذاب**

كل جرح اقدر أبلعه... إلا إني ابلع لي حريق!

الجرح لا جا من غريب... البس عليه من الثياب

لين يتلاحم ببعضه... ما اكشفه حتى لرفيق

الموت... لا جا من خوي اقرب من الناس القراب!

ساعتها من قو الألم... ثوبي على صدري يضيق

ما هي قوية صدمتي... شفني وانا اتلاشا سراب

في روح ما مدت يديها لي وانا رجل غريق

حاولت امررها وهم... من صدري الـ صدر العتاب

لكنها... نامت على صدري وعيت لا تفيق

اكذب عليك ان قلت لك... طيب ولا فيني صواب

ابك الضلوع اللي إ/حضنك شفها من إ/طعونك تويق

وش تنتظر آدمي... صدره بيادر من خراب

غنابها ناي القصب شوق الصوامع للدقيق

ما عاد لك فيني مقام... اطلق جناحك للسحاب

يمكن... يغسلك المطر... وتعود زي اول شقيق

ما للمدى ذمة... واذا عانيت من طول الذهاب

اخلق من اوهام الاياب ان كان تقدر... لك صديق

يا صاحبي لا تعتذر... هاك المسافة والغياب

شف لك طريق ياخذك... وانا بدور لي طريق



ناصر حطاب الدهمشي