السيسي: هنفضل نعمر في كل مصر
وجّه الرئيس عبدالفتاح السيسي، أمس، التحية إلى المصريين والجيش، لمناسبة احتفالات القوات المسلحة بالذكرى الـ48 لنصر أكتوبر.
وقال في كلمته خلال الندوة التثقيفية «العبور إلى المستقبل» في «كل سنة وأنتم طيبين جميعا واسمحوا لي إن إحنا نرحب بأحد أبطال حرب أكتوبر، سيادة الفريق عبدرب النبي حافظ، أهلاً وسهلاً».
وحرص السيسي، على توجيه التحية للواء سمير فرج على قيادته للكتيبة التي خدم بها الرئيس في بداية حياته العسكرية، مؤكداً أنه لم يذكر إطلاقاً عبر وسائل الإعلام أنه قائده.
وقال اللواء فرج «لما رحت الكتيبة كان معايا ملازم أول عبدالفتاح السيسي، ويوم ما تركت الكتيبة كتبت التقرير السري ومنحتك تقدير امتياز (...) وقلت الضابط ده هيكون له مستقبل.. قلت الكلام ده من 40 سنة، نفس المنظر ده شفته يوم ما قرر يخلص مصر من الإخوان».
وعن حرب أكتوبر، قال السيسي «مفيش مقال اتكتب فى جرائد مصر من وأنا عندي 9 سنين، إلا لما كنت أقرأ عنه وعن حالنا باختلاف كتابنا وألوانهم واتجاهاتهم، ومكنش فيه ثقة إن إحنا نقدر نعبر (قناة السويس) ونحقق اللي حققنا».
وتابع «فيه جدار تاني محدش أتكلم عنه، دايماً أدبيات وثقافة كل عصر تشكل حاجز وجدار أمام صناع القرار في عصرهم (...) وبعتبر إن قرار الرئيس أنور السادات ومبادرته للسلام، هي قدرة على قراءة واستعداد لتجاوز أدبيات مستقرة في عصره».
وأكد أن «الدولة المصرية تبذل جهودها من أجل البناء والتنمية، وبتكلم بكل تواضع، الدولة حكومة ومسؤولين تبذل أقصى جهد في ظروف استثنائية مش علينا بس، على العالم كله، وبنقول هنفضل ننمي ونبني ونعمر في كل حته فيكي يا مصر... ومصر تستحق كده، وفيه تحديات وصعاب، بفضل الله سبحانه وتعالى هنتجاوزها، وبكرة تشوفوا عطاء ربنا لبلدنا، وهتشوفوه علشان هو ربنا من فضلك يارب».
وأشاد الرئيس المصري بدعم الدول العربية لمصر بعد ثورة 30 يونيو.
ولمناسبة الاحتفالات بنصر أكتوبر، أصدر السيسي قراراً في شأن العفو عن باقي العقوبة لبعض المحكوم عليهم بالسجن.
