يا حسين الوصايف

|شعر علي العايد الهاجري|
 لا زال حبّـك ناشـب فــي حنـايـاي
متشبـثٍ بـيـن الضـلـوع النحـايـف
والوقت ما يمدي... وأنـا توّنـي جـاي
والشـوق سوّابـي مثـل منـت شايـف
وش معجلك كلّه علـى شـان فرقـاي
ماهـوب حقّـي منْـك ياغلـى الولايـف
عقدين وصلـك مـا تسـاوي عطايـاي
ولازلت أحبّـك يـا حسيـن الوصايـف
جيتك وشوقي لك يسابـق لـك اخطـاي
مانـيـب نـشّـادٍ ولانـيـب خـايـف
فأنا علي لا جا النِّشب جيت لي راي
أقـدم ولـو بعـض الخسايـر حسايـف
أنا أدري إن دربك يـودّي علـى إعـداي
وأدري بعـد صـدّك يجيـب الكـلايـف
وشفني وصلـت وميـزةٍ مـن مزايـاي
طايـش .. ولكنّـي فلانـيـب هـايـف
الله مـن وقـتٍ جمعْـك أنـت ويــاي
تبكي علـى صـدري ودمعـك ذرايـف
يا واحـدٍ تـدري عـن أستـر خفايـاي
وتـدري بعـد خلّـك يِعَشْـق النوايـف
ولازلت أحبـك حـب... يـا داي ودواي
والله علـى مااقـول شـاهـد وشـايـف
هـذا وهـو تــوّك تـنـوّي بفـرقـاي
وشلـون لا قفّيـت يااغلـى الولايـف