فخر البلاد

تحمد الأمير عبدالرحمن بن مساعد بن عبدالعزيز آل سعود شعراً بنجاة الأمير محمد بن نايف بن عبدالعزيز آل سعود ونظم قصيدة عنونها فخر البلاد.

يا إله الكون يا البر الجواد
ياكريمٍ توب عبده يقبله
يامنجّي هود من تدبير عاد
وراحم وغافر لكل من تاب له
نحمدك ما سال في طرسٍ مداد
وما هطل هتان وانبت سنبله
حق تنجي المؤمنين من العباد
في العصور الماضية والمقبله
جا مزِيّف توبته باغي الفساد
وأكرمَه إبن الكرام وقابَلَه
ما حضر مخفور أو وسط القياد
ولو تبي جتك الأعادي مكبلَه:-
يا شجاع الدار يا فخر البلاد
يا محمد طبعكم ما أنبله
عاليٍ قدرك ودايم في ازدياد
ومَتسَرْبِل بالمكارم سَرْبَله
إزْرَعَكْ نايف وللدين الحصاد
وللعدو طوفان همّ وغربله
طاب شعري واعتلى بمدحك وساد
وطاب راسك : وافتخِر واقبَلَه
تب طبع الغدر في قلب السواد
تب له .... ثم تب له .... ثم تب له
الخوارج ما لهم غير الزناد
نفسهم للشر دوم مْجبَّله
يا مراوي بامرهم وش باقي عاد
وش تراوي في عقول مْخبَّله؟
لجل تعرف عندهم وشّو الجهاد
يكفي تعرف بس ..... وين القنبله؟!!