منتخب القارات... مغلق للتحسينات!

| د. سعيد فهمي «المصري أفندي» |
زي أي فرحة في حياتنا مابتكملش... وان حاولنا نحافظ عليها مابنعرفش... وعن اسباب هزيمتنا وخيبتنا ماتسألش... علشان لو حاولت تعرف ما تقدرش... لأن احنا كده وحنفضل كده ودي حكمة رب العرش...!!
والدليل منتخب شحاتة اللي جاب الفرحة عندنا جوه البيوت... والناس بالأداء كانت مبهورة ياعيني كانت حتموت... شفتنا قدام ملوك العالم؟ كنا زي الاسد بيلاعب كتكوت... اداء وفدائية ورجولة وحاجة كده زي الحوت... كنا زي الفراعنة بندافع عن سمعتنا بالكورة والنبوت...!! لكن ياخسارة طلع كل ده زي حلاوة الروح... ورجعت ريما لعادتها القديمة ورجعنا ننوح... ولقينا عشوائية في التشكيل واداء مفضوح... وشفنا فذلكة ونقص في اللياقة بكل وضوح... رغم اننا حذرنا وزعقنا بالصوت اللي تعب وبات مبحوح..!! مافيش كلام الرياضة فوز وهزيمة... ولازم نتقبل كده بكل شجاعة وعزيمة... لكن لازم نتعلم ونفتح ملفاتنا القديمة... لازم نعرف سبب هزيمتنا من ولاد اللئيمة...!! ونعرف سبب الانهيار بكل صراحة وشجاعة... وليه في مباراة اميركا اختفت روح الجماعة واتغير اداء فريقنا من الرجولة للمياعة... هو امتى يبقى عندنا من الاستهتار مناعة... وليه على طول نتهم الارهاق ونعمله شماعة... والغريب تلاقي تبريرات وحكايات عالفضائيات مذاعة... عمرك شفت فضيحة بالصوت والصورة في التلفزيون والاذاعة!! المهم شفنا الفريق كلنا وغرابة الاداء والتشكيل... ولاحظنا هبوط المستوى بعد الاداء الراقي الجميل... وبعد ماطلعنا بفريقنا السما وهات يافشخرة وتدليل... ونسينا فضيحة الجزائر وقلنا فريق وطني اصيل... اللي فرح شعبنا كله وقدم يوم ايطاليا الدليل... مش حرام يتبدل الحال والفرح يبات ذليل...!! والسؤال هو ايه آخر جملة خلينا ننسى اللي فات... وليه بنلاقي دايما الحجج والتبريرات وكمان فذلكة ومبالغة في الحكايات... ومين اللى خلى الناس تتقهر وفي الحزن تبات...؟ فيه حاجة اكيد جوانا غلط... مش معقول تلاقي فريق بياكل النجيلة ويمضغ الزلط... وفجأة تلاقيه انهار وعقده انفرط... والمعلم اللي العالم كله حياه وصفق له باحترام... ييجي يخترع تشكيل غريب من غير نظام... ويجرب اشكال جديدة قليلة الخبرة والعلام... ورغم انه نجح بتشكيله السابق مافيش كلام... لكن بالعناد والفذلكة زرع فينا الآلام ويارب استر وتمر تصفيات كأس العالم بسلام... والسؤال هو ليه مش بنقدر نحافظ على فرحتنا؟ وليه تلاقينا بنرقص دايما عالسلالم وتضيع عزيمتنا... وليه مافيش منظومة في حياتنا بتزيد همتنا... وليه بنلاقي دايما الاعذار بتبرر خيبتنا...!! الكورة في حياة الناس عندنا هي السلوى الوحيدة... واللي بتنسيهم همهم وتزرع الفرحة الاكيدة... وتنسيهم الغلاء والقهر وتخلي اوقاتهم سعيدة... لكن تعمل ايه لو طالها اليأس وبقى جواهم عقيدة... يبقى هنا اصل المشكلة وهو ده بيت القصيدة...!! وطبعا هنيئا لكل مسؤول عننا بالرعونة في الاداء... لان الناس انغمست في الكورة بمنتهى الإلهاء... ونسيت مشاكل حياتها والضرائب والغلاء... والبطالة وارتفاع اسعار الكهرباء والماء... وانفلونزا الطيور والخنازير وكأنه عقاب من السماء... ويارب ترحمنا وتزيل عنا البؤس والعناء...!! هزيمة المنتخب فرصة متكررة للمسؤولين ذهبية... وحاجة تلهي الشعب وتنسيه مشاكله اليومية... لكن ياترى ايه رأيك في الحدوتة ديه...؟ لما تلاقي كل شوية حكاية تشغلنا عن مشاكلنا المنسية... مرة الكورة ومشاكلها الروتينية... ومرة خطاب اوباما وزيارته التاريخية... والصراع في ايران وتزوير الانتخابات الرئاسية... وصفقات القمح الفاسد ودخولها البلاد بطريقة مخفية... وقضية أكياس الدم ومحاكمتهم القضائية... ومصرع سوزان تميم وتزاوج فساد المال والمهلبية... يابخت المسؤولين بانشغالنا عن اصل القضية... لكن سيبك انت وخلينا نرجع لخيبتنا الكروية... والحمد الله ان فريقنا كسب صك البراءة الاخلاقية... مش بيقولوا المهم الاخلاق ايه يعني بقى الهزيمة في البطولات العالمية... لكن ياريت نجومنا يبطلوا تهديدنا باعتزال المباريات الدولية... وبلاش حد يوضف نفسه بالفدائي صاحب المهمة الوطنية... لأنه بيكسب ملايين وشهرة خرافية... وبياخد مقابل مجهوده دولارات كتير ونقدية... وعشرات الالوف من الجامعيين عاطلين من غير وظيفة حكومية... ومبروك للكابتن حمص علي منحة العلاج المجانية... وياريت صاحب المستشفى يعالج كام غلبان بنفس المصداقية...!! وياريت نتغير بقى ونبدأ الغربلة بطريقة فورية... وكفاية فذلكة تشكيل ولخبطة اداء وخطط عشوائية... وياريت نعالج مشاكلنا في الكورة والسياسة بصورة علمية... ويكون عندنا فريق قدير وحكومة رحيمة تحس بمشاكلنا اليومية... نفسنا في فريق وحكومة عندهم لياقة بدنية وفنية... ويحققوا طموحات الناس ومطالبهم الشعبية... عايزين الكورة تفرحنا وكمان حكومتنا الوطنية... ويارب نتمتع بحكومة تخلي حياتنا جميلة وهنية... وده ممكن عن طريق شوية وظائف ومسكن بسيط وعلاوة اجتماعية... ونتطهر من الفساد والاحتكار واصحاب القروض المهلباتية... وياريت كل ده يكون مخلوط بحرية انتخابات وديموقراطية... ساعتها مش حندور على دكان شحاتة ولا نشتري بضاعة وهمية... وحينعدل حالنا ونبقى احسن ناس في الكرة الارضية...!! وهي دي الوصفة اللي حتخلينا كلنا في الهنا نبات... وسيبك من الكورة وخيبتها وخد وهات... وخلينا نفوق لحياتنا وننسى الآهات... وخلي دكان شحاتة زي ما هو مغلق للتحسينات تفتكر ممكن يحصل كده وللا ده من المستحيلات...؟ لكن لو محصلش يبقى عليه العوض في اللي جاي واللي فات... وساعتها نغني سلامتها ام حسن او ابوك السقا مات...!!
Said_elmasry [email protected]