الصبر نعمة

صبرت (خمس سنين) من شان الابداع
معه بياض الوجه لاقلت لي بيت
هانت وهان الصبر يا درب الأوجاع
وان كان ما جتني على ما تمنيت
الحمدلله شاعر(ن) دمث الاطباع
ما همني شي (ن) على شان ياليت
اسرجت خيل (ن) وادخل البحر بشراع
ووجّه (الدفه) على ما تهقويت
(متبوع) في شعري ولاني بتباع
وعن قمة أخلاقي حشى ما تنحيت
واللي مقدر واجب (ن) معه بنصاع
آمر (ن) من المولى ليا حل سميت
صليت راجي ينفرج ضيق الأوضاع
مسلم واعرف الدين والحق لاجيت
ما خفيه في صدري على شان الاطماع
وليا حداني ضيم وهموم صليت
رزقي على اللي محي العرق بالقاع
العزوة اللي قبل (وايل) تعزويت
ماجيت بشري (مصلحة) لجل تنباع
أخلاقي اللي دونها جعلني ميت
الشعر حسن أخلاق تطربه اسماع
تحليل موقف صادق (ن) فيه مريت
وسميته تضرب على كل مرباع
فيهاه تسمع به ليا رحت وان جيت
يعيش لو صاحبه موته ترى ذاع
يذكر بخير (ن) لو تطروا به بيت
هذي مناة النفس في بدع الابداع
وقفت (ثلاث سنين) ما قلت ياليت
الصبر نعمه والعقاوي بالاضلاع
وعن قمة أخلاقي حشى ما تنحيت
خالد مفلح الدعسان