حبيبتي

الوقت ما هو حكمة... الوقت تجريب
يا تجربة وقتي قضى العمر تمي
كلي شتات اوراق يا سكة الطيب
للي بقى في دفتر الريح لمي
واضم انا صدرك لصدر العراقيب
لين اخنقه من طول مشيي وضمي
لعيون من تملا عيوني تراحيب
واملا نظرها حب واقول سمي
قلب يحده ضلع ويمره اشعيب
غيثه غلاك وسيل واديه دمي
وعشبه إلى هب الهوى فاح به طيب
قام ايتمايل كنه يقول شمي
يا للي بحبل ارضاك كل المقاضيب
يا همي اللي لجله اغليت همي
حبيبتي يا بعد كل الاصاحيب
يا بعد ابوي وبعد خالي وعمي
احس راسي فوق روس المراقيب
إلى انحنى لمصافح ايديك فمي
وكن الكفوف ان جيت ادور بك الشيب
باقات ورد وسلة الورد كمي
ان كان شافوا في خضوعي عذاريب
عذروبي اني شفت مدحي بذمي
حبيبتي يكفيك فخر عن العيب
بنت الكرم واخت المناعير وامي
رشيد الدهام