نصيحة

الشاعر والاعلامي عامر حماد السحلول زار ابنه الرائد بدر اول دخوله في الكلية العسكرية وجادت قريحته بهذه القصيدة التي تحمل الكثير من النصح والحث على القيم والاخلاق الحميدة وخدمة الوطن والتمسك بالدين والعادات والتقاليد الطيبة. اليومي زرنا اللي عيوني توده
زرنا بدر يا علنا ما فقدناه
شفقٍ على شوفه لنا عنه مده
والحمدلله يوم جينا وشفناه
الوقت عقبه بالثواني نعده
وانشهد انه غاية القلب ومناه
شفته بلبسه لايقن فيه قده
في خدمة ابلاده عسى الرب يا قاه
يا بدر لك عندي كلامٍ بعده
وابيك تفهم له من اقصاه لدناه
درب العلا يا بوك لازم تمده
ترى الولد ما يظهره غير يمناه
يابوك درب المرجله لا تصده
اتعب على العالي ولو صعب مرقاه
اصبر على وقتك ولو فيه شده
من لا تعب درب المواجيب ما جاه
موقفك ابي كل الخلايق تعده
لا جاء مجالك للرجاجيل تدراه
من جاك عاني يا بدر لا ترده
ترى جميلك مع هل العرف تالقاه
ورافق رجالٍ للوفا مستعده
الرجل يعرف من ربوعه وممشاه
ودرب الردى خلك على طول ضده
ولا تتفق في كل ما قال وياه
والنفس دعها عنه دايم مصده
دوّر رفيقك من هل الطيب والجاه
والدين حذرا يا بدر لا تهده
لا خير في من باع دينه بدنياه
يا بوك علمي لك تمسك بحده
أخذ النصيحة بأول العلم واتلاه