شيء سخيف لما تلاقي الزمن تتغير فيه الثوابت والغالي ببساطة يبقى رخيص... لما تتنازل عن هيبتك وتبقى خيبتك بجلاجل مفضوح يا عيني وبايع الغالي والنفيس... سمعتك ومكانتك وتاريخك حاجة مش عارف قيمتها ولا داري بقيمة دم سال من أيام الهكسوس حتى حروب السويس... التاريخ لا يكذب يا صديقي وأصحاب التاريخ ذاته واللي بدمهم كتبوه مش حييجي يوم ويبقوا مُضغة في مخ حاقد مريض أو أي عميل خسيس... هو صحيح القوالب نامت والانصاص قامت وللاخلاص حينقدنا كل من هب ودب وكل من معاه ريالين من الهوا واللي تصنيفه بين الأمم سيس... اللي بيحصل لبلادنا من مهانة تصريحات من اللي مايسواش واللي مايسواش برضه بقى حلم غبي مخلوط بكوكتيل كوابيس... خلاص ضاعت الهيبة وحلت علينا الخيبة وقفانا استوى من طرقعة البراغيت واكتفينا ببيانات خيبانة وطبطيب وتحسيس... لو شفت بيانات الخارجية والرد الناعم على هتك سيادتنا حتحمد ربنا كتير إن لسه فينا حد بيغير عالبلد دي... خلاص بقينا ملطشة وكل بيان وبيان عامل زي الخازوق يطلع من عينينا وإحنا يا دوبك نحسس والمسؤولين في الخارجية آخر تهييس... الله يرحمك يا عبد الناصر وفينك يا عم سادات اللي علموا كل مسيء للبلد ده الأدب وكانوا فعلا فراعنة رجالة من أحفاد رمسيس..تخيل بلد عاملة زي خيال المآتة بتتدخل في شؤون سيادتنا وإحنا يادوب نتقمص ولا تحس إن فيه سيادة ولا خارجية ولا بيان من السيد ببلاوي اللي شغلته في البلد بولولم وعامل فيها للحكومة رئيس... البلد ده فيه رجالة وشعب ياكل الزلط وبيعرف ياخد وقت اللزوم تارُه ويتاوي أي عبيط في الدرة أو حتى يرميه في الهويس... قال إيه زعلانين إن إخوانهم البُعدا مش جماعة إرهابية ولا هُم ليهم في التهليس... يا خسارة من الداخلية للخارجية يا قلبي لا تحزن وزارات محتاجة فلترة عاوزة دكتور أسنان خبير يخلع مسؤوليه أو ينضفها من التسويس... !! تدخل بعض الدول في سيادتنا بقى شيء غير محتمل وبغيض وخارج عن اللياقة السياسية..اللي له واللي مالوش بقى بيحشر مناخيره فينا وكأننا بلد من جمهوريات الموز ولا كأننا الولايات المتحدة العربية... مصر بلد كبير وعظيم وكل قزم لازم يقف وهو بيكلمها ويبقى قد كلمته ويتحمل الغلط والمسؤولية... بلدنا وإحنا حُرين فيه وشعبها شعب واعي وعارف إيه أصل جماعة السوء وليه هي إرهابية... البلد ده فيه شعب وجيش حر صاحب إرادة وفاهم خيوط اللعبة وحس بقدر المؤامرة وخرج مع شعبه وهدم المعبد على دماغ صناع المخطط وكشفهم وظهرت وبانت كل خطة دنيئة لهدم وتقسيم أم الدنيا بهية... مرة علبة كبريت ومرة المستر أردوغان وختامها كان كمان وزير الخارجية في المنظومة الفارسية... الكل ياعيني زعلان ومقهور ومفروس من الجدع اللي اسمه سيسي اللي فهم اللعبة بدري وقلب الطاولة وهدم مخطط سنين كانوا بيحلموا ينفذوه ونسوا أن في البلد دي عيون سهرانه رضعت من خير البلد دي حب وانتماء وفداء لكل حبة رمل مصرية... الخلاصة البلد ده ليها أصحاب عارفين قدر بلدهم حتى لو جالهم إحباط من اللي بيمثلوا وزارة بتفتقد الجرأة والشجاعة وبتتعامل للأسف في مسائل الكرامة بنعومة وديبلوماسية...!! وكمان اللي زاد وغطى تخاذل الداخلية على مظاهرات وإرهاب كل واحد عامل فيها متأسلم وماسك رق وتار... بيخرجوا على الشعب الآمن بالسلاح والمولوتوف عاوزين يحرقوا الدار والدوار... عاملين زي عفريت العلبة ومبرطعين والداخلية قال إيه بتلتزم بضبط النفس والله يا أخي الواحد بجد من الأشكال دي اتلخبط واحتار... مواجهة الإرهاب مش عاوزة نعومة ولا طبطبة ولا سكوت على حرق عربات الشرطة عاوزه دكر بجد وراجل صاحب قرار... البلد ده فيها شعب خرج بالملايين وقال كلمته ورأيه يوم 30 /6 وأثبت للعالم أنه صاحب الكلمة والأرض والدار... اللي خايف من المنظمات إياها المشبوهة يقول واللي على راسه بطحة يغور لأن البلد ده بلد أحرار... اللي خايف يقولوا إنكلاب واللي خايف من الحساب يسيب مكانه الوقت وقت الحسم ولا عاد فيه مكان لمتخاذل ولا لعميل خائن غدار... ونرجع من تاني نقول المرحلة دي عاوزة العين الحمرا والقضية الحديدية من حاكم واعد قوي جبار... أي مهادنة تبقى تخاذل وتهاون في سيادتنا وهلفطة وخزي وعار... اشتقنا لبلدنا بلد الخير والأمان اشتقنا للفرحة والاستقرار... مش شوية رعاع متأسلمين بدقن عيره حيتحكموا فينا ويقلقونا شوية عملاء بينعموا بإرهابنا بفضل الريال والدولار... مش كل خيال مآتة حيتنطط علينا وإحنا نغمض عينينا ونقول معلش عيل وغلط ونسيبه يقلب بلدنا فوضى ودمار... لازم نفضح كل مخطط وكل خيال مآته فاكر نفسه آمن لازم يعرف إن اللي يهزر مع البلد يبقى بيلعب بالنار... لازم نفضح كل عميل وكل متآمر البلد أمانة والوقت اللي إحنا فيه مش محتاج هزار... آن الآوان نشم هوا نضيف ونطهر بلدنا من الهاموش والجاموس لازم نخلص بلدنا من الغيم والغبار... افتحوا كل الملفات وعرفوا الشعب كل خطوة وشاركوه وعرفوه كل الأسرار... هي دي الحقيقة وهو ده المخطط واللي مش فاهم كده يبقى وعفوا يبقى في الأصل حمار... خلاص فاضل عالحلو دقة وأهو الدستور جاي والباقي أنتوا عارفينه خلاص فاضل على الليل دقة ويطلع علينا نهار... نهار مصر القوية الجريئة العفية صاحبة الكرامة الحقيقية والإرادة الفولاذية المستقلة بلد خير أجناد الأرض الثوار الأحرار... أي والله هم دول بجد ومهما قالوا أصحاب الأرض هم دول اللي بجد الثوار... أي والله هم دول اللي بجد الثوار...!!said_elmasryfahmy@hotmail.com