صوتك يناديني

الشاعرة المميزة بقايا روح، واشراقة خاصة جداً يحفها الشعر من كل جهاتها، وباقة ملونة من الحب والقرب والخيال...!
اللي على شانه تدوس الصعيبات
وتواجه اقدار الزمان الرديه
وتشاركه في ضيقته والمسرات
وتصون عهده لو يخونه خويه
وتتعب لجل عينه ولرضاه وتبات
شايله في قلبك.. وروحك وفيه
وتسقيه من صافي شقى الصدر دمعات
وتعشق مع العالم طراوي سميه
لاتنصدم لو جات لك منه زلات
و اهمل وجودك او تناسى مجيه
او شفت قدرك طاح واصبح سخافات
وصار احتياجك له ناره وغيه
وفجأه بعد كل الغلا والحكايات
تكشف لك الايام حاجه خفيه
تصبح احاسيسك بعينه تفاهات
وتشوف نفسك في يدينه شقيه
وتدخل معه مشاعرك في متاهات
تنسى معاها كل ليله هنيه
تبعده عنك دنيته بالمسافات
ويخضع لكل افكاره الواقعيه
ويصعب عليك ترد وقتن معه فات
مهما تحاول مايغطيك فيه
لو تحترق في وحدتك عشر مرات
ما تنفعك دمعه بعينك عصيه
ولو تعتصر قلبك من الضيق ونات
مايلتفت لو تنكوي ألف كيه
في وقتها ماعاد تنفع مواساة
الجرح مقياسه بكبر الخطيه
وان كان باقي بك بقايا وجولات
حاول تهز اعروق قلبه شويه
ياهيه ياللي معك كل البدايات
ليه ان رجيتك عطف تبخل عليا؟؟!!
لحظه التفت لي وين ذيك المسرات؟؟؟
وين اختفت لمساتك الشاعريه؟؟؟
وينه حبيبي بنشدك عنه بالذات
وين الذي ماشفت في الناس زيه!!!!
وينك وجود وذات واحساس مامات
ياللي تذوقني مرار المنيه
ماكنت احسب حسابها لين ماجات
واصبحت في حرماني (انصاف حيه)
(صوتك يناديني) وانا ارد بسكات
حزين قلبي... مايرد التحيه

بقايا روح