ياحبني لك

| عـلـــي بـن عــايــــد  |
إن كان ما تقــدر تجينـــي ولا اجيـــك
فمــا لهــــا داعــي نسمـّــى حبــايـــب
هـذي يدينــي ضمـّـهــــا بيــن اياديــك
وأنسى معك جور الزمّــن والمصايــب
عطني من ظروفك دقايق وانا أعطيـك
سنيــــن عمـــري كلهـــا لك وهــايــب
كم لي وأنا اتحرّى مجيّـــك وأراعيــك
وأقـول تحكمْـــه الظـروف الصعايـب
وطال البعاد.. وطال حتى الرجا فيك
وما تبت من حبــك.. ولانيــب تايــب
حبّــك بقلبــي مــا يجــي فيــه تشكيــك
وغــلاك متســاوي مع اغلى القرايــب
يالصاحب اللي كــل ما فيــك يحكيــك
لـو قلت في وصفــك فعنــدي سبايــب
أغليك.. وآحبك.. وأعزك.. وأداريك
وقلبــي نقـي من الصــدى والشوايــب
لا مــرّ زولك حــرّك القلــب تحريــك
كــنْ الجديــل وبيـــن متنــك طلايــب
ومبيسمــك ولا علـى البـال يطـريــك
قطعـــة حــــلاوه ذوّقـوهــا لشـايـــب
وتوتــّــينـك كنهــا فـي صحــن كيــك
وعيونــك اللــي كلـّـبــوهــا عجايــب
لاشفت طولك قلــت يا طــول لبـّـيــك
فـديــت خــدّينــك وشـقــر الذوايـــب
ولاشفت خصرك قلت يا قلْ ما فيـك
ولاشفت ردفك قلت ياويــش جايــب
يا حبّنـي لك يا بعــد عيـــن مغليــك
أنشهــد إنــي بــك مــوّلــع وذايــب
يا كثــر صدّاتــك ولا قلـت مابيــك
وهذي سنه مرّت عن العين غايــب
فما قول غير الله يحفْظك ويحميــك
ويستر عليك من الخطر والنوايــب