سَم بسم السلام وزان مبداها
والمشاعر تسولف عن مباديها
طار للجو قاف الشعر واشجاها
حي طيرٍ تغنى في معانيها
لي على الحرف شرهه ويتحراها
نبض قلب الخليج اللي يناديها
اجتمعنا على التقوى ومعناها
ما يداني خفوقٍ ما يدانيها
وارتفعنا نجوم ٍفي محياها
نور والدرب واضح في مساريها
يوم حنا نجيها ما حدٍ جاها
الصقر له خزيزه ما يخليها
من يغوص البحور وحس نجواها
في هديرٍ يقول الموت تاليها
من يشوف الصحاري خاف ممشاها
في سمومٍ يشقق جلد ماشيها
راس مال الخليج ارجال مسعاها
ما تهاب المنايا في مساعيها
والعفو شيمةٍ حنا ورثناها
والقلوب العظيمة مجدنا فيها
يا هلا والهلا عرضة لعبناها
لعبة الحرب في نجد وروابيها
ديرةٍ للحرم حامي ذرا حماها
(اخو نورة) حماها عاش حاميها
ألف مليون مسلم ما تعداها
نشوة الدين والإيمان داعيها
مرحبا والمداين سبع انشاها
(للفلاحي ) شهودٍ في مبانيها
عمر الأرض والإنسان مبناها
يا عسى الغيم يارحمن يسقيها
والامارات صوت العز مغناها
جر لحن المهابة في أغانيها
بالهلا والغلا حنا دعيناها
من غلاها هلانا ما يكفيها
ديرة (للخليفة) وان حضناها
بحرها كم حضنها في شواطيها
دار (دلمون) تواريخٍ قريناها
في بطون المراجع بان ماضيها
ودوحة للخليج القلب حياها
قال كل الخليج الله يحيها
فج وجهه الخطر بالبوم وارساها
(ابن ثاني ) على العليا اموديها
في صدى المال واليامال طرياها
والشهامة طبيعة في أهاليها
مسهلا والرسايل بان فحواها
ديرة عمان والسلطان غاليها
عزّها بالعلوم وجدد ادماها
ونجمها في سماها حب اراضيها
والحصون المنيعة لا ندبناها
سولف الصمت فيها عن خوافيها
دارنا وش نقول إليا ذكرناها
وين أبدى بحضرها أو بواديها
كويتنا عزنا والشيخ يمناها
أخو مريم قمرها في لياليها
صانها الشيخ والربان أرساها
بفضل ربي على العزة مراسيها
له عينٍ تنام وعين خلاها
ساهرة في أمورٍ بان صافيها
هو رمز البلاد وهو رجواها
في حياته كويت العز يفديها
ديرتي والمعاني في مزاياها
يتعب الحرف ما يقدر يجاريها
يوم ذات السلاسل ثار مرماها
في بلادي صدى التاريخ يرويها
والمعاني لها حيٍ تمناها
صانها في عزير الروح وافيها