طبعك الهادي

| شعر: علي العايد الهاجري |
وين أنت .. ياللي تِحسْب إن غيبتك سهله
والله ماهيـب لا سهـلـه ولا عــادي
تعال وشف نـار بعـدك كيـف مشتعلـه
وأنـا علـى مفارقـك مانيـب معتـادي
عوّدت عيني على شوفـك يابـو كحلـه
يابـو وسـاع فعلهـا حطّـم عـنـادي
ويابو جديـل .. وجبيـن غطوتـه قذلـه
وزودٍ على رقتك .. لك طبعـك الهـادي
أحسبْ لوصلك .. وهجري كنت تحسب له
وتسعى لبعدي .. وقربك غايـة مـرادي
وكبدي علـى مفارقـك حرقـا ومندبلـه
ماهيـب عقبـك تبـي شـرب ولا زادي
والله ياللـي حصـل إن كلهـا زعـلـه
عوّد علـي طالبـك لا تحـرقْ فـؤادي
عوّد على واحدٍ في الحب مـن جهلـه !!
من راحْ !! ما راح يصوّت له ولا ينادي
يموت قلبـي ولا أذلّـه ولا أسمـح لـه
وأحرم عيوني بعـد مـن لـذة رقـادي
ما عـاد منِّـك خفوقـي شـيْ يحتملـه
وإن جات صوبْ الكرامهْ .. ماني ابغادي
من صدْ ما رحت أدوّر له ولا أبحث لـه
إلا أنت تـدري عليـك يحدّنـي حـادي
لاشك تدري وأنـا أدري ماهـي ابسهلـه
ولا التمنَـي يوصِّلنـي علـى مــرادي