ثامر سلمان وتواجده الثاني الذي يعلن من خلاله تواصله وتألقه في خريطة الشعر الشعبي، إطلالة جميلة لشاعر ننتظر منه الجمال دائما.
إلا على طاري القدر والحشيمه
أبسألك: وينه وداد المحبين؟
وين الوفا بين النديم ونديمه؟
وين المعزّه يا خليّ المضامين؟
وإلا الغلا في مبدأك صار غيمه
تمر فوق اثنين وتودّع اثنين
كان لغلاك بداخلي ألف قيمه
وكنت بعيوني كنز يسوى ملايين
زرعت طيبي والغلا كان ديمه
ترويك لين اصبحت تملك بساتين
بستان حب وشوق بستان شيمه
بستان طيبه عطف لكن على مين؟
رفس النعم له العواقب وخيمه
شف وين كنت وشوف رايح على وين
ما ألوم قلبك لو عروقه سقيم
مريض غدر وعلته بالشرايين
الحب يصلح للنفوس الكريمه
وإلا الردي يصلح بوسط الرديين
انت انتهيت وعاهتك مستديمه
ماعاد ينفع بك علاج المداوين
ما عاد لك بالقلب قدر وحشيمه
دامك مجنب عن دروب الوفيين
بيت وبأقوله فيه حكمه عظيمه
أوّله لك وآخره للعظيمين
الكذب... حكي أهل النفوس اللئيمه
والصدق زينه للرجال العزيزين


ثامر سلمان