لقد فقدت أخاً عزيزاً وقبلي فقدت قبيلة حرب منبرا من منابرها العالية.... انه اخي ووالدي شاعر حرب الكبير: متعب الديري: ابو فهد: عزائي للديرة جميعاً ولابنائه فهد وخليل وخالد ولجميع اسرة المرحوم...
لا والله اللي غاب نور الفحيحيل
غدا به اللي ما يحذّر نذيره
اقفى به اللي ما ترده مداخيل
وخلى النفوس اللي توده كسيره
اللي تعود قطف روس الرجاجيل
ولا هو يفرق بين متعب وغيره
ابوفهد ما هو بحاجه لتدليل
الديري اسمه شمس في كل ديره
راعي هلا والهيل نسل الحلاحيل
ومن اطيب الاجواد معدن وسيره
ريف الرجال اللي تحب التعاليل
اهل المواقف والوجيه السفيره
عنده صعيبات القضايا تساهيل
واليا ارتكى شال الحمول الكبيره
ما قولها حبِّ لبدع التماثيل
راضين بالمكتوب شره وخيره
ياما فقدنا من سيوف مصاقيل
وياما تجرعنا الكؤوس المريرة
وياما تعبنا من عنا الحط والشيل
واليا نسينا هم جانا خشيره
لكن زمان اليوم به هدّه الحيل
والآدمي يجهل نهاية مصيره
الموت حق ولا لنا عنه تبديل
والدرب واحد والمسافة قصيرة
خلف محمد الفريدي