قم يا فهد

| شعر: خالد بن عبدالله السبيعي | قم يا فهد شغّـل خـوي المناعيـر
جيبٍ لذودك يـا فهـد مشترينـه
نبي نشوف الـذود دق ومعاشيـر
شعـلٍ يابـوك ودربهـا مهتوينـه
اللي غلاها فـاق كـل التصاويـر
كارٍ لنـا فيمـا مضـى حافظينـه
لو عادلوهـا بالذهـب والدنانيـر
قلنـا يسـار يسـار يـا عاقلينـه
نتبع هواهـا بالرخـا والمعاسيـر
والرزق عنـد الله وربّـك معينـه
وإن قدّر الله.. جت ليال المخاضير
عشبٍ جديد وخالطـه كـل عينـه
فيه الشقـارا والكحـل والنواويـر
والقحويان يفـوح ريحـه وزينـه
ساقـوا عليـه مدلهيـن الأباكيـر
كلٍ علـى الطـولات ينـدا جبينـه
زان التحدي عقب فـك المقاهيـر
واللي قعد ذوده يشـوف الغبينـه
يوم اختلط فالجو عـج ومعاصيـر
جاء للعشاير نـدب يـا سامعينـه
كلٍ بـذل جهـده ولالـه معاذيـر
الفعل واضـح والعـرب شاهدينـه
اللي خذا النوماس شعلٍ مساطيـر
اللـي فحلهـا قبلهـا محتسيـنـه
قادتهم الهـدلا وخطـو المعاشيـر
كنها تقـول الـدرب لـه قايدينـه
طبت فياض العشب قبل المظاهيـر
ترعـى زماليقـه بوقتـه وحينـه
والبيت شيّـد للنشامـا المساييـر
في رأس مشرافٍ جـذب ناظرينـه
ربعة شرف فيه الوجيه المسافيـر
أهل الوفا وأهل العقـول الرزينـه
هذا عضيد وذاك زبـن المخاسيـر
والكـل منهـم موقفـه شايفينـه
من بينهم صفر الـدلال المباهيـر
فنجال كيف ودارهـم مـن يمينـه
ودارت سوالفهـم بحلـو التعابيـر
كـلٍ يجيـب النـادرة والثميـنـه
سوالفٍ يطرب لها صغيـر وكبيـر
والعـود الأزرق بينهـم دايرينـه
من عقبها ساقوا حليب المصاغيـر
ولقط الزبيـدي بالغظـا مشتوينـه
وطليّهم يطّبخ بعد علّـق عصيـر
سلـمٍ لهـم فالبـر وألا المديـنـه
ولا حان وقت الفرض ما فيه تأخير
طاعة ولي العرش رأس السمينـه
هاذي طراة الروح قبـل المقاديـر
والعمر واحـد مـا تكـرر سنينـه
وقم يا فهد شغّل خـوي المناعيـر
إنص الجنوب ودربهـا عارفينـه