والد المغدورة نادين: ابنتي محترمة وملهاش في المخدرات والخمور ... وأدهم كان عاوز يتجوزها و«رفضت» / (3)

| القاهرة - «الراي» |
في قضية مقتل المغدورتين هبة العقاد ونادين جمال الدين المعروفة بقضية «حي الندى» في مدينة الشيخ زايد، تواصل «الراي» نشر نصوص التحقيقات كاملة، وبعدما نشرت التحقيقات مع المتهم الوحيد بالقضية محمود عيساوي، وأقوال زوج هبة علي عصام الدين، وأقوال صديق نادين أدهم أبوالنور، تنشر ما جاء في أقوال والد المغدورة نادين، ووالدة المغدورة هبة، وصديقتهما وحارس أمن في حي الندى الذي شهد وقائع الجريمة.
وكانت نصوص التحقيقات وأقوال والد المغدورة نادين جمال الدين، وجاء فيها:
- فتحت النيابة المحضر وسألته عن اسمه.
- اسمي خالد محمد جمال الدين، والد الضحية نادين، واللي حصل ان حماتي كلمتني على التلفون في السعودية وبلغتني ان نادين بنتي وجدوها مقتولة في البيت، فأنا رحت أخدت بعضي ونزلت على أول طيارة على مصر ورحت على طول على الفيللا، وهناك المباحث منعوني اني أطلع فوق لغاية لما النيابة جات وعملت معاينة وأنا كنت معاهم وكانت أول مرة أخش فيها الشقة بعد لما مرات عمها نظفت الشقة وهو ده كل اللي أعرفه عن الموضوع ده.
• وسأله المحقق سبق وقرر المدعو علي عصام الدين علي بأن نجلتك كانت على علاقة والمدعو أدهم هل لديك ثمة معلومات عن تلك العلاقة؟
- أيوه، هي بنتي نادين السنة اللي فاتت لما نزلت أجازة حكت لي على اللي اسمه أدهم ده وقالت لي عليه انه عاوز يتجوزني، فأنا رفضت وقلت ليها لما تخلصي الجامعة الأول.
• وهل تقابلت مع سالف الذكر ذات مرة؟
- لا، بس أدهم ووالدته قابلوا المدام بتاعتي وقعدوا يتكلموا معاها بخصوص جواز أدهم من نادين وبلغتهم قبولي بس مع التأجيل لغاية لما نادين تخلص دراستها، وأنا ساعتها قعدت مع نادين بنتي وطلبت منها تقطع علاقتها بأدهم وتكون في حدود الزمالة.
• وهل من خلافات فيما بين نجلتك وأنت وثمة آخرين؟
- لا، احنا علاقتنا بالناس كلها كويسة ومفيش خلافات بينا وبين حد.
• هل لديك أقوال أخرى؟
- أيوه، أنا عايز أقول ان بنتي محترمة وملهاش في موضوع الخمور والمخدرات زي ما بيقولوا وان بنتي عذراء وان اللي دخل الشقة دخل بطريقة غير مشروعة ودليلي على كده كلام اللي اسمه علي وفرد الأمن، وان كمان باب الشقة كان مقفولاً بالقفل وان أكيد حد كان مراقب الشقة وكان عايز يسرق الشقة واتفاجأ بوجود بنتي واللي اسمها هبة.

ليلى غفران: هبة تزوجت علي من دون اشهار
 

ليلي غفران

حضرت جميلة عمر بوعموت (45 عاما) وشهرتها ليلى غفران الى سراي النيابة وحلفت اليمين وتحدثت عن ظروف معرفتها بالحادث من زوج ابنتها وسلوك الضحية وتوقفها عن تعاطي المخدرات، وأنها توجهت للمستشفى وكان قميص علي كله دم.
• يسألها المحقق وما مضمون ذلك الاتصال الهاتفي الذي قمتم بتلقيه من المدعو علي عصام الدين حال تواجدكم بالمكان والزمان سالفي الذكر؟
- هو علي اتصل وأخبرنا بان هبة اتصلت بيه وقالت له انها وهي نايمة عند صاحبتها نادين دخل عليهم واحد حرامي وضربها بالسكين، وقال لينا انه راح ليها وأخدها وطلع بيها على مستشفى دار الفؤاد.
• وما الذي استبان لكم حال وصولكم لمستشفى دار الفؤاد آنذاك؟
- احنا أول ما وصلنا قابلنا علي عصام الدين اللي هو جوز هبة، وكان وقتها واقف ومرتبك وكان قميصه كله دم، وقال لي اطمني هبة جوه في غرفة الطوارئ والأطباء في المستشفى عملوا ليها اللازم، واحنا فضلنا قاعدين في الريسبشن بتاع المستشفى لغاية لما عرفنا ان هبة توفيت لرحمة الله وهي في غرفة العمليات.
• ويسألها المحقق عن علاقة ابنتها بـ علي: منذ متى نشأت تلك العلاقة الزوجية؟.
- هو علي اتجوز هبة من حوالي سنة وكام شهر، لكن هو يعرفها من حوالي 4 سنين وكان خطبها فترة وبعد كده اتجوزوا.
• وهل تم اشهار ذلك الزواج؟.
- لا.
• وما الذي حال دون ذلك الاشهار؟.
- هو احنا كنا مستنيين لما أنا وهبة نجهز نفسنا لموضوع الجواز ده وعلي كمان يجهز نفسه.
• وماذا بشأن علمك بتعاطي نجلتك مواد مخدرة؟.
- هي كانت بتتعاطى المواد المخدرة زمان واتعالجت، والموضوع ده وقف من حوالي 4 سنين.
• هل تتهمين أحداً باحداث اصابة بنجلتك أودت بحياتها.
- أيوه، وأطالب باتخاذ الاجراءات القانونية في القبض عليه.
• ما طبيعة علاقة نجلتك بزملائها في الجامعة؟.
- هي علاقتها بالناس كلها كويسة.

رنا مصطفى صديقة المغدورتين: هبة سمعتها كويسة  ... ونادين كانت تتعاطى وتشرب الخمور

وصلت الى سراي النيابة زميلة و صديقة المغدورتين هبة ونادين وتم سماع شهادتها.
• ما صلتك بالمجني عليهما هبة ابراهيم عقاد ونادين خالد محمد جمال؟
- هبة ونادين دول أصحابي، ونادين ساكنة قريبة مني في حي الندى.
• ما معلوماتك بشأن الواقعة محل التحقيق؟
- اللي حصل أني يوم الأربعاء 26/11/2008 نزلت ورحت الجامعة حضرت محاضرة وكانت نادين بتحضر محاضرة خلصتها قبل مني وفضلت مستنياني وقابلتها وقالت لي احنا هنستني هبة لغاية لما تيجي من على المحور، وفضلنا قاعدين مع بعض لغاية لما هبة جات ورحنا احنا الثلاثة أخدنا التطعيم ضد الحصبة الألماني. ونادين طلبت مننا أنها تسيبنا وتخش علشان أدهم مستنيها في البيت فاحنا اقترحنا أننا نقضي اليوم مع بعض.
وبعد كده حضرت أنا وهبة محاضرة مع بعض واتفقنا مع نادين أنها تيجي عندي البيت وأنا هستناها أنا وهبة، وهي أتأخرت شوية وجات حوالي الساعة 8 تقريباً مساء، وفضلنا قاعدين مع بعض لغاية لما والدي جه حوالي الساعة 7.30 مساء واستأذنا منه أن نروح عند شقة نادين علشان نعمل عشاء مع بعض ونأكل مع بعض، وفعلاً رحنا البيت عند نادين وعملنا الأكل والكيك بالشيكولاتة وأكلنا مع بعض، وبعد كده والدي كلمني حوالي الساعة 10.45 مساء وطلب مني أني أرجع على البيت علشان الوقت كان متأخرا فأخذت بعضي ونزلت ورحت على البيت قعدت شوية وبعد كده نمت.
وصحيت على مكالمة الأستاذ علي حوالي الساعة 6 صباح يوم الخميس 27/11/2008، وهو قال لي اصحي اصحي فيه واحد دخل شقة نادين وضرب هبة ونادين بسكينة يلا بسرعة روحي شوفي فيه ايه أنت ووالدك، فجريت علشان أصحي والدي ملقيتوش في السرير ولقيته بيصلي، مرات والدي راحت المسجد وقالت له، وبعد كده عرفت أن هبة ونادين اتقتلوا، ومن وقتها وأنا حالتي النفسية سيئة جداً.
• متى وأين حدث ذلك؟
- الكلام ده حصل يوم الأربعاء الموافق 26/11/2008 بعد لما رحنا الجامعة ورجعت أنا وهبة وجات لي نادين على البيت عندي في فيللا والدي.
• من كان برفقتك آنذاك؟
- هو أنا رحت الفيللا أنا وهبة وجات لينا نادين على الفيللا.
• وحال تواجدكم بالعين محل الحادث هل من ثمة حوار دار فيما بينكم آنذاك؟
- لا، هو كل اللي حصل أني واحنا واقفين مع بعض في المطبخ اتكلمنا مع بعض شوية على الأكل وغسيل الأطباق.
• وحال تواجدك برفقة سالفتي الذكر هل تناهى الى سمعك ثمة مكالمة هاتفية وردت لأيٍّ من المجني عليهما سالفتي الذكر؟
- أيوه، هو جات مكالمات كتير لنادين وما أقدرش أحدد مين اللي كان بيتصل بالضبط.
• هل تناهى الى علمك أن المجني عليها هبة ابراهيم عقاد سوف تمكث طرف المجني عليها المتوفاة نادين خالد محمد جمال ليلة الحادث؟
- أيوه، سمعتها بتقول لمامتها انها هتبات عند نادين الليلة دي في التلفون.
• وماذا بشأن علمك عن حسن سير وسلوك المجني عليهما سالفتي الذكر؟
- هبة كويسة وسمعتها كويسة ومبتشربش غير سجاير بس، أما نادين فهي كانت بتتعاطى بعض العقاقير وساعات بتشرب خمور.
• هل تعلمين ثمة معين تثور حوله الشكوك بمقتل المجني عليهما سالفتي الذكر؟
- لا، أنا معرفش، ونادين كانت ليها علاقات متعددة بأصحاب من داخل الجامعة ومن برة ومعظم أصحابها أنا معرفهمش.
• ولماذا لم تقومي بقطع علاقتك بالمجني عليها نادين خالد محمد جمال رغم علمك بما قررتيه سلفاً؟
- أنا بعدت عنها فترة وبعد كده رجعنا لبعض وجات اعتذرت لي.
• هل أخبرتكم المجني عليها المتوفاة نادين خالد محمد جمال بشأن ما دار بينها وبين المدعو أدهم الوارد على لسانك سلفاً؟
- لا، بس هي أخبرتنا بأن فيه حوار دار بينه وبين والدته، وفي الحوار ده هو نهر والدته، ونادين قالت انها عنفته نتيجة ذلك.
• هل كنت تعلمين بطبيعة العلاقة الزوجية فيما بين المدعو علي عصام الدين والمجني عليها هبة ابراهيم عقاد؟
- أيوه، هي هبة كانت قالت لي انها متزوجة من علي، بس طلبت مني أني مقولش لنادين.
• وحال ذهابك للعين محل الحادث هل كانت المجني عليها المتوفاة نادين خالد محمد معتادة المكوث داخل نطاق معين من الشقة.
- أيوه، هي علطول كانت بتقعد في الليفنج.
• ما قولك فيما قرره وشهد به بالتحقيقات علي عصام الدين (تلوناه عليها)؟
- أيوه هو ده اللي حصل.
• هل لديك أقوال أخرى؟
- لا.

حارس الأمن في حي الندى: أدهم كان دائم التردد على الشقة

استمعت النيابة العامة لأقوال حارس الأمن في حي الندى، ويدعى أسامة محمود عبدالله (26 عاما).
وسأله المحقق: ما الحال التي كان عليها محل الحادث تحديداً؟
- الشقة كانت مقفولة، وما كانش فيه أي آثار عنف على باب الشقة، ولما دخلنا بعدما كسرنا الباب لقينا الدنيا ضلمة قوي ما عدا حجرة «الليفنج»، هي اللي فيها نور، ولما دخلنا لقينا هبة نايمة على كنبة وعمالة تجيب في الدم، فقمنا شلناها ونزلنا بيها على العربية بتاعة الأستاذ علي وطلعنا على مستشفى «دار الفؤاد».
• وماذا بشأن تردد أشخاص معينين على العقار محل الحادث؟
- هو أفراد الأمن قالوا لي ان فيه شباب وبنات بيدخلوا لنادين وساعات بيدخلوا معاها.
• وهل أخبرك سالفو الذكر عن شخص معين دائم التردد على المجني عليها سالفة الذكر؟
- أيوه، هو فيه واحد اسمه أدهم كان دائم التردد على الشقة وساعات كان بيبات عندها.
• وهل من اجراءات تتبع لدخول حي الندى؟
- أيوه، هو الحي له اتنين بوابة، وكل باب من تلك الأبواب عليه حراس أمن ومينفعش أي حد يدخل الا لو أخدنا جميع البيانات الخاصة بيه.
وممكن يدخل أي حد لو داخل مع واحد من الشبان، ولو فيه حد عاوز يدخل غريب ومعاه سيارة تتاخد بياناته ورقم العربية، ولو ماشي على قدميه بناخد منه البطاقة لغاية لما يرجع ياخدها، غير كده مش ممكن حد يدخل حي الندى الا عن طريق البوابتين دول والاجراءات دي اللي أنا قلت عليها.