مها محمد مذيعة وممثلة وقعت ضحية لزاوية مقلب.... أجرينا الاتصال بها من رقم غريب، على اعتبار أننا معجبين بتجربتها في التمثيل والتقديم التلفزيوني مع ابراز دورنا كنقاد حريصين عليها واستفزازيين بقسوة لها، وبدأت معنا وكانت جادة وهادئة، وكلما زاد ايقاع نقدنا لها، ترتفع سخونة أعصابها تجاه اسئلتنا، وأثبتت لنا مها محمد جانبا انسانيا راقيا جدا، قلما نجده في الوسط الفني، فعلى الرغم من اتهامنا لها انها «ما تعرف تمثل» الا انها قررت مساعدتي حين طلبت منها أن تساعدني لأحصل على دور تمثيلي، وأبدت رغبة انسانية عالية الرقي في تعاملها مع استفزازتي... هنا نص ما دار من حوار بين فنون «الراي» مع الطيبة الحنونة الممثلة الكويتية مها محمد
• ألو مرحبا مها.... كيف الحال... والعيال ؟
- الحمد الله تمام... منو معاي.
• أنا من أشد المعجبين في تمثيلك وفي تقديمك التلفزيوني، وحبيت أتصل وأتحمد لج بالسلامة... يقولون مريضة وتعبانه وااايد؟
- ما تقصر يا أخوي... أي والله تعبانه... حاشني صداع نصفي من فترة طويلة وأحس بألم مو طبيعي... وان شاء الله محد يشوف اللي قاعده اشوفة.
•... بس أكيد هالتعب من كثرة عمليات التجميل اللي تسوينها... الله يهديج يا مها.... هدي اللعب بروحك شوي ؟
- قالت باستغراب: والله صج؟؟ شنو هالعمليات، أنا سويت عملية وحدة بس لخشمي (لأنفي)... لكن الكل كبر الموضوع وسويتوها سالفة.
• شنو عملية وحدة، تقصين علي أنت مسوية عشرة عمليات تجميل.... وشكلك واضحين أول واليوم ؟
- لا... قول ثلاثين عملية أحسن ؟ انته أي شي... لا تألف وتروج اشاعات عني، وبعدين أنا صرحت وايد اني مسوية عملية وحدة فقط، الظاهر مو متابعني بالجرايد... ياحظي عليك...
• عموما خلاص بحاول أصدقك وهدي أعصابك... وأنا دايما أتابع مسلسلاتك وايد حلوة، وكنت أتابع البرامج اللي قدمتيها؟
- مشكور... أنت «تكسر وتجبر» بنفس الوقت بالكلام... قبل شوي غلطت علي، وتتهمني بستمية عملية، والحين تقول متابع لأعمالي و... معجب... عموما شكرا اخوي, وانته كلك ذووووق.
• بس ليش رازه ويهك ورايحه مشاركة في المسلسل الاردني «نمر بن عدوان»... ؟
- ردت بعصبية: أنا رازه ويهي؟ صج أسلوبك (.........) وبديت تخورها... تكلم عدل، وخل عندك احترام بكلامك علشان... أحترمك، آنا ماأحب أغلط على أحد، ولا أي أحد يستخدم أي اسلوب معاي... اوقف عند حدك وأحترم نفسك.
• (قلت لها ضاحكا): هذا الصج... الظاهر رحت لهم وترجيتهم ودفعت فلوس واااايد، علشان يعطونك دور معاهم في مسلسل «نمر بن عدوان» ؟
- ضحكت بسخرية وجاوبت بعصبية: ضحكتني... وأنا مالي خلق أضحك, أنا ما أدفع فلوس حق أي أحد، أصلا... أهمه يدفعون لي مو أنا أدفع... ويحصل لهم الشرف أن تشاركهم وحدة كويتية «بطن وظهر» مثلي وكفاية ان أنا الممثلة الوحيدة من الكويت اللي شاركت... وعلى فكرة خذ هالخبر عشان تثري معلوماتك، أهم طلبوني بالاسم، وهذا دليل اني مطلوبة وفيني طاقة فنية شكلك مو شايفها. وأنت ليش زعلان.... ممكن أسألك وتجاوبني يا... معجب...!
• هاهاهاهاهاي مو زعلان... شكووو ؟؟... ومن المنحوس اللي قال انك تصلحين تكونين.... فنانة أصلا ؟؟
- أجابت باستهزاء: لا «تكفه» طالع أعمالي... الله يخليك تابعني... ومن تكون علشان تحكم وتقيمني... الحمد الله عندي جمهور ومتابعين على الراس والعين والجمهور الكويتي جدا جدا ذويق، ولو أنت وغيرك ماتعرفون قدر الفنانين ولا تحترمونهم لا تتصلون... ولو أنا «مو شي» ولا أعرف أمثل سكر تلفزيونك اذا شفتني طالعة، ولا تتعب نفسك وعيونك.
• أكيد ماراح أتابع بعد هالمكالمة بصراحة صدمتيني بالكلام اللي قلتيه بذمتك هذا أسلوب فنانة بالله...؟
- على راحتك... أنت اللي قاعد تغلط وأنا مستحملتك وماودي أغلط عليك.
• ممكن تساعديني... بس طلب وااااحد ؟
- آمر... قول وفكني.
• شلون أصير ممثل ممكن تساعديني وترشحيني أو تقدميني للمنتجين أو... المخرجين؟
- لأني جدا طيبة وما أعرف أرد طلب أحد راح أساعدك رغم ان أسلوبك غريب... خاصة أن المنتجين يبون ممثلين شباب لان الفنانات صاروا واااايد وبالهبل... راح أساعدك طالما انك طلبتني.
• صج والله... راح تصيرين واسطتي فنيا...وتقدميني للساحة وأصير فنان كبير وأشارك في هوليوود؟
- قالت ضاحكة: عاد هوليوود مرة وحدة، خلنا نوصل احنا بالأول علشان توصل أنت مع... ويهك....!!!
• وشفييييييه ويهي... الكل يقول.... اني حلو؟
- شنو هالغرووووور.... (تضحك).
• عاد سمعت أن أنتي حقودة وغيورة...ولا تحبين الخير لأحد؟
- قالت باستغراب: أناااااا؟؟؟ أنا ماأعرف الحقد والحسد أصلا ماأعرف هالامور بالمرة وأنا ياخوي انظلمت وعانيت من هالاشياء من أقرب الصديقات، ومن زميلات بالوسط الفني أهما يحقدون علي ويحسدوني... ولو سمحت لا تتكلم من غير ما تعرف الحقيقة... أنت ما تعرفني عدل ولا عايش معاي ليش تحكم علي بالاعدام وأني شريرة «حرام عليكم» يا ناس لا تتكلمون اذا ما تعرفون الحقيقة، وعلى فكرة أنا أكثر وحدة أرشح الممثلات للأعمال والمسلسلات ومع هذا ما أنطر كلمة شكر أو شهادة ومدح من احد نفس الباقي، كفاية أن الله سبحانه وتعالى موجود ويشوفني... وأتمنى أنك تروووح ولا... تتصل.
• خلاص... أنا غلطان مضيع وقتي الثمين معاك يا مها... روووحي الله يسهل دربج «ماتشوفين شر»؟
- قالت بحزن: صج ما يبين بعينك... يعني تبي أبوس أيدك علشان تصير ممثل... وتبي الصج الحق مو عليك مو أنت الغلطان، أنا الغلطانة اللي حتى الحين محترمتك، ومو مسكرة الخط بويهك... الله يسامحك (وكأنها بدأت بالبكاء).
• خلاااااص لا تبكين يا مها يا حلوة... يبا احنا جريدة «الراي» وهذا مقلب؟
- صرخت وهي تضحك: «الراااااي» كل شي حلو أتوقعه منكم يا «الراي» الا هالمقلب... أنا صج صج أحبكم... بس منو معاي.
• أنا أنا أنا... حمود؟
- قالت ضاحكة: فديتك يا أخوي الصغير جذي تسوي في «أخيتك» أختك... الله يغربل ابليسك وبنفس الوقت الله يسامحك.
• عزيزة وغالية... ممكن تزودينا بجديدك عاد هالمرة... صج هذا سؤال صحفي ؟
- «بهدووووء»: أولا دايما أكون مستانسة لما تسأل عني، وتتصل برقمك اللي أعرفه مو هذا (تضحك) وأقول لك يا حمود من قلبي هالكلام (الله يوفقك ويسعدك) ويخلي لنا الأستاذة (النحلة) ليلى أحمد...، وجديدي عندي عمل لشهر رمضان القادم لتلفزيون دبي، وعمل ثاني لقناة كويتية «معروفة» بالاضافة لمسلسل مع المنتج الفنان نايف الراشد، وما أقدر أصرح أكثر من جذي... اعذروني وفي فكرة لبرنامج جديد... وفي أعمال أخرى في طور الدراسة لم تتضح الرؤية بعد... وراح أخبركم عن التفاصيل أول بأول بعد فترة.
• شكرا (أختاااااه) ومع السلامة؟
- حافظك ربي... الله يسلمك... سلم لي على أخواتي واخواني بفنون «الراي».