للهواية خصائص في كيان ذائقة عشاقها، وكم هو جميل عندما تلتقي الهواية والموهبة معاً في نص راق يفصل في محتواه اغراض الوصف والفخر والمدح في متعة هواية الصقور وموسم المقناص...
خل اشقر الجنحان وين انت رايح
باب القنص دربه على الكل مسدود
اما تغامر في جميع اللوايح
والا تخاوي واحدٍ كنه سعود
البابطين اللي على الكل شايح
رجل الوفا والمجد والطيب والجود
النادر اللي يستحق المدايح
عندي على مدحه براهين وشهود
في شف باله ما يطيع النصايح
ما يسمع العاذل ولاهرج منقود
هذا غرامه في هذيك البطايح
هدات مسعورٍ اليا صار مجرود
والا اشقرٍ توه مدهل وطايح
طرح الشبك جابوه لْـ سوق ممهود
من ماكره ما حط فيه الشرايح
عوق الخريش اليا اعتلا فوق بصعود
في خايعٍ ريح النفل فيه فايح
ماطبه الشاوي ولا راعي الذود
مسقيه مزنٍ با اول الوسم طايح
اللي تْشارك فيه براق ورعود
عليه رجعٍ بالسحاب الروايح
لين اكتست ريضانها عشب وورود
يا خذله ايامٍ مع الطير سايح
يبري ضميرٍ من غثا القيض ملهود
وختامها عطرٍ زكي الروايح
يسوقه الغربي اليا ذعذع النود