ما من جديد

سؤال تقليدي ما من جديد بهذا السؤال وهذه الاجابة جاء هذا النص الرائع من فرحان محمد...

ليه تستغرب إليا قلت مامن جديد

وليه تزعل وهو ماله بقلبك صدى

من متى وأنت ترخي مسمعك للقصيد

أنت حتى قصيدي راح عندك سدى

صاحبي والطعون اللي مداها بعيد

جعلها للسنين اللي مضت لك فدى

مابقى شي لأجله نستفيد ونفيد

كل حلم ٍورى ركب الهقاوي غدى

حلْ عنّي ترى صدري ماعاده جويد

المواديع ماخلّت لصبري مدى

طالبك لاتكثّر بالكلام وتعيد

جرحك العام عاده فالحشا ماهدى

ماخسرتك غناه ولاذخرتك عضيد

أنت ضايع وأنا مانيب ضايع جدى

نسمة الليل لامرّت غصون الجريد

مالها فوق وجهه غير قطرة ندى

كنت غالي وحبك مسكنه فالوريد

وكانت العين لأجلك ماتلدْ بحدى

وكنت مثل السحاب وجيّتك يوم عيد

لابدت غرّتك عند المواجه بدى

للأسف بعد ماكنت الغرام الوحيد

صرت ذكرىً على الجال الهيال تحدَى

شامت النفس ياراع الزهاب الزهيد

إيه مقدي لو إن ما فالمحبه قدى

سق مطاياك ياجعلك بعيد وسعيد

لكن أوعِدْك ما ألحق سمعتك بالردى