التواريخ المجيدة

بعد صل الله على المختار عقب البسمله

يا بيوتي اقبلي و الخيل من خيالها

من هجوسٍ ما يجيب من الجزيل الا اجزله

يفرق جزال القصايد عن محط هزالها

يا سلام الله سلامٍ مستحقه جمله

كنه سهيل لرجالٍ تنتخي بـ جمالها

يا سلام الله على اللي ما تعلّه مسئله

كل عقده بالسلام و بالوغى حلالها

سيدي صباح الاحمد و الآمور مسهله

كم بلاوي زالها ما حدّ قبله زالها

الامير اللي جعله الله لنده معضله

كن ربي سلطه على العدا سلالها

قايد انسانية و قايد نجاح و مرجله

اشهد ان سود الليالي طلعت رجالها

العديم الحازم الصارم و لحدن يجهله

الصعايب لو تصعّب شاربٍ فنجالها

أشكلٍ لا من تبيّن ما تبيّن مشكله

بيده طوال المشاكل ما يطول إشكالها

ان فرح كن الحياه بكل فرحه مقبله

وان تضايق تصطفق من جالها لـ جالها

كم يغبطونه بشر ما تفعل اللي يفعله

تفتخر فيه الفعايل لا نوى بـ افعالها

له عطيه لا عطاها مزنةٍ و محمله

ربّعت جدب الصحاري من ثقل همالها

و اشهد ان ربي بـ نواف المعالي كمله

شيخ كل قلوب شعبه بالمحبه نالها

منبع الطيبه و حسن الخلق راسٍ مطوله

المكارم و المفاخر و الكفو مدهالها

عن مواجيبه و عن حاجات شعبه ما دله

قد ما كل الثقايل فوق متنه شالها

ان هقا فيه الآمير بهقوته ما يخذله

قد هقواته كبير و كلمته يحما لها

و اللوازم و المواقيف الشديده من هله

ما ينزّل أي حاجه غير في منزالها

صعب لا منه تحزم للكليف استسهله

يا امير الدار لك يمنى يظل ظلالها

ولك شموخٍ يقهر الجوزا و لك شعب ازهله

شعب اصبح للشعوب المضرب لـ أمثالها

الصبور الواثق الثابت و لحدن زلزله

الطموح لكل حاجه يندر اللي طالها

له مع المجد المبنى و العُلا اعرق صله

و تجدد لو يلبسها الزمان سمالها

شعب ناسه بالمآسي يْتشكل سلسله

كم مآسي عايشوها ما شكوا غربالها

و كم عدوٍ ذوقوه المر ثم فر جفله

دون دارٍ بالشهاده يكربون حبالها

دارنا و اللي جعل بقلوبنا لج منزله

عيدي جعل العواذل ما تطول سبالها

عيّدي يا كويت و الفرحه تسابق من وله

عيّدي دام الليالي طيب الله فالها

عيدي ياللي بشوفج كل عين مكحله

عيّدي يا دار قومن ما برح عيّالها

بين صفحات التواريخ المجيده الاوله

دارنا قصة كفاحٍ دونتها ابطالها

ماضي الوقت الجميل لحاضره مستقبله

ترجي طلتها الآراضي سهولها و جبالها

يا عساه يعاد عيدج كل عام و يجعله

بين ناسٍ دون حدج يفتدون عيالها

| بدر نايف الكبيح |