محطات

رسالة شعر

ما واحداً منا تنّكر لمبداه

في إحساسنا ماقد شرينا و بعنا

لو غيرنا زلّت به اقدامه وتاه

واصبح يعيش بدنيته دون معنى

حنا عرفنا الوقت فأوله واتلاه

لوينخدع به غيرنا.. ما انخدعنا

| مرزوق الروقي |

ابسط حقيقة

ابسط حقيقه ما رصدها عرب سات

انا لسوء الحظ فكري رصدها

السابق اللي من سلالة كحيلات

خوّن بها الفارس وخيب سعدها

طاحت على قطاع ليل وعصابات

وامست أسيره واتعب القيد يدها

واستنجدت ما حولها غير الاموات

يالله تقر عيونها في ولدها

| عطية الكوح |

نظرة غرام

نظرت فيها مثل نظراتها في

وعجزت اقاومها وصديت عنها

كل النساء ظلماء وهي بينهن ضي

غطت شعاع الشمس أشعة بدنها

من الذهب تلبس خلاخيل وحلي

سود محاجرها وحمر وجنها

ما دري تسمى من ومنين ومن أي

وش هي قبيلتها وموقع سكنها

| عبدالله بن زويبن |

مشاعر

تعال لملم ما بقى شفني على كف انهيار

منين ما لديت عيني بالوله رديتها

خذني غلا خذني وله خذني على أية مسار

خذني بقايا من جروح وشمعةٍ طفيتها

واضح و لا عندي نوايا تختفي خلف الستار

اجمع ملامح ضيقتي واسمع صدى تشتيتها

| خالد المحسن |