تل قلبي

من القديم هذه القصيدة ارسلها الاخ منصور اللغوي وهي للشاعر بطاح بن حصيّن العازمي وهي القصائد الرائعة بالوصف

تل قلبي تل هافٍ تعرّض له وعر

حده الطارد على العرق والسايق حداه

ضايقوه اهل الجمارك محذفة الغتر

باغيينٍ ذبحته مير ربي ما نواه

اضربوه بصافياتٍ بهن قفشٍ حمر

شي قدامه و شيٍ حذفه الله وراه

وباشره باثنين واقفى مع العرق و زفر

وقام ويله يشلع القشع لامنه وطاه

ما وطى ويله من القاع حافرها حفر

من عجاجه غابت الشمس في عالي سماه

وحوّله من نايف العرق للسهلة حدر

ثم ضفّه مثل فرخٍ تقفّى له قطاه

يوم قفّى مثل حرٍ مع اللجّة شهر

مطلبٍ له خارمٍ باغيٍ منها عشاه

من نوى في لحقة الهاف ماعنده نظر

يتعب الطراد شوحه إلى منه عطاه

عوّد الطرّاد لا جاب علم ولا خبر

قال علمي فيه لينه قطع هاك النباه

من عشيرٍ سم حالي وعرضها الخطر

لا رحم نفسي ولا فك نفسي من غثاه

يا طلبت امواجهه دوم قدّم لي عذر

وان بغيت اجفاه ما اجفاه من زايد غلاه

ما ذبحني كود شقرٍ على زين النحر

والردوف اللي ليا قام شالنّا العباه

كن خده يوم فرّع قمر خمس وعشر

صافيٍ جوه و نوره على اول مبتداه

عنز ريمٍ قادت الصيد بفروع الحجر

يركض اللقّاف و يرد منها ما رماه

كن عوده عود موزٍ يساجيه النهر

والثنايا بيض والعمر باول مستواه

سم حالي يا تخطّى بمكسِيٍّ خضر

يقصر الخطوة ويضحك ولقاني قفاه

اشهد انه بالغلا حاشرٍ قلبي حشر

ليت ربي فكني يا ابو سالم من هواه

لوّ انا بسويسرا و الحبيّب بالحفر

حاضرٍ طاريه عندي لو اني بالصلاه

بطّاح بن حصيّـن العازمي