الكلمة الجارحة

|شعر:عبدالرحمن البدّيع| الليل انا ساريه . والصبح انا سارحـه
اتبع سنع ناس غيري . ماتبعت اسنعـي
اصابح الهـم والهاجـوس  وامارحـه
لكن تدرين  . ياصفوة هجوسـي دعـي
عواطف ٍ تترك الاعدا علـي  فارحـه
وصكي عليها بوسط الصدر لاتطلعـي
ياليتنـي ماسمعـت الكلمـه الجارحـه
ياصاحبي بسألك . هل كلمتك من وعي
اشووف ماكـن شـي قلتـه البارحـه
وانا من البارحه تاكل وتشـرب معـي
ياليت ماصار بيني وبينك  اِمصارحـه
وياليت مامرت الكلمه علـى  مسمعـي
اصبحت كن الجبل . ربي علي  طارحه
من هول ماقلت يوم انك علـي تدعـي
ياللي لعينك صخرت افكاري السارحـه
لاقيت بعد الغلا على يـدك مصرعـي
قد كنت يامبهج اهموم الصدر شارحـه
واليوم خليتني اعـض راس  اصبعـي
لكن شكلك نسيـت الكلمـه  الجارحـه
وانا من البارحه تاكل وتشـرب معـي