معقوله...؟

معقول أغيّر عقول الخلق وأقنعها

ماهوب معقول ياللّي قال معقوله

ياخي أنا يالله بنفسي أطوّعها

مالي على الخلق لا حكم ٍ ولا طوله

يالأجودي لو بنفسك شي موجعها

هالوقت غيّر كثير نفوس بسهوله

نفس ٍ ذليله تشوف المال يرفعها

ونفس ٍ عزيزه تركها الفقر مذلوله

ورجل ٍ يجيها اللّحاف بطقّة إصبعها

ياللّي يمدّد بقد إلحافه رجوله

أثبت لك إنّا مع أنفسنا نخادعها

وإنّا نعيش الهزيمه كنّها بطوله..

نقول دنياك لو ما طاعتك طعها

وهي عمرها ماتطيع الحي ّ بميوله

وبإسم الرجوله عقب ما الوقت شيّعها

قمنا نكابر بوقت ٍ مابه رجوله

وأحلامنا كذبة ٍ عشنا نرقّعها

ونضحك على بعضنا بأحلام مقتوله

بايدين مشلوله ب نبني مرابعها

بالله من قد بنا ب إيدين مشلوله ؟

والنيّه الطيّبه من طيب منبعها

وكل ٍ على قدر طيبه يسرج خيوله

مثل القصيده يدّلك طيب مطلعها

عنها وتبقى بكل ّ لسان مقيوله

مانيب مخبول يعشق بنت ضيّعها

ولا سالفة عاقل ٍ هايم بمخبوله

السّالفه كان ودّك تعرف إسمعها

ياللّي تلوم الدّحيمي إسمع لقوله :

زرعت ورده وليتي قبل ما أزرعها

في روض مشتل نشدت الرّوض منهو له!

ويوم أزهرت شفت راع الروض يقلعها

قدّام عيني وأنا ب إيدين مغلوله

وقّفت مذهول وعيوني مدامعها

تشهق بدمع ٍ وقف بعيون مذهوله

ناديت : يا عم ْ تكفى بس أطالعها

وأشحذ وجيه العرب وأقول : قولو له

عين ٍ تجوع السّهر من شان تشبعها

يا تنعمي يا تخلّي النّفس معلوله

قالو تبيها نصيحه بندقك بعها

ماهي صوب الجفول ولا هي بحوله

وأمسيت وأنا أطفّي الشمعه وأولعها

في حروة الفجر مير الليل ياطوله

إن لمت عين ٍ بكتها الثانيّه معها

وإن جيت أبنسى ولا هو شي ياهوله

من عقبها النّفس طاري الورد يفجعها

وألعن أبو الورد كلّه وأعشق ذبوله

وآخر سؤال ٍ حرم هالعين مضجعها

وأقفت تشوف الحقيقه شبه مجهوله

يا اخي اكفّر ذنوبي يمكن ابلعها

لكن اكفّر ذنوب الخلق معقوله..؟!