خاطرة إلى أبي رحمه الله

يا يبه رحمة الله تنزل عليك

وتنور قبرك

لكن يا يبه الناس تفرح بالعيد

وشوفني بفراقك حزين

يا يبه تراني أتحرى شوفتك

تعايدني قبل العالمين

يا يبه أبي أكحل عيوني بشوفتك

وأكسر صمتي الأليم

صرت أسمعك تناديني

وألبّي والتفت وأتحرّى

عيونك هي راحتي

تراني انحرمت أنطق يا يبه

يا يبه والله أحبك

وأعشق كل حرف من اسمك

ماني معترض على حكم الله

لكني فعلاً اشتقت لك

رغم غيابك دهن عودك

يأكدلي إنك موجود بهالمكان

تدري يا يبه اني كل ليلة

انتظرك قبل لا أنام

أنتظر دعسة رجولك

بغرفتي حتى أحسّ بالأمان

لمسة إيدينك تمسح على جبيني

بعدها أغمّض عيوني

ليه تأخرت هالمرّة يا يبه

وينك تعال

مشتاقة لحضنك الدافي

أبي أحس بالأمان

يالغالي من رحلت عن دنياي

وكل شي أظلم فيني

يالغالي من رحلت عن دنياي

واللي فيني يكفيني

تعال يا يبه واخذني لبعيد

عندك من إيديني

أبي احس بدفاك

والدنيا تنور بعيني

| الشيخة سهيلة فهد المالك الصباح |