لكل حادث حديث

الشاعر عمار القليبي أرسل لنا هذا النص الرائع يقول خلوني ادلي بدلوي ولكل حادث حديث

خلوني أدلي بدلوي قبل يدلابه

وأشرب من الكوثر الي كله عذوبه

بيوت شعرٍ كتبته أبتغنابه

أطرب غوى بين منكوسه ومسحوبه

أشبعه بالمعاني واتوصابه

واصونها بالفكر عن كل ما يشوبه

الشعر يرقابي السلم وانا ارقابه

نبدابه من أوله طوبه ورى طوبة

ولياحداني زماني حادي ركابه

أبني بيوتٍ ماقد قبلي تغنوبه

أمثال من قولنا ومن قبل يحكابه

تبين لعقول وعن عقول محجوبة

لكل حادث حديثٍ يانفتح بابه

ولكل شارب مقصٍ قد ماجوبه

بعض البشر لو حكت مانحسّبْ حسابه

ونحسّبْ لكلمةٍ من ناس محسوبة

وبعض البشر لو تجينا مادرينابه

ورجال من حشمته ناقف لمندوبه

ولأ كل رجلٍ يعوّض برجل بغيابه

بعض العرب تكمله وأعداد منسوبه

الحر يعجب له رجالٍ تعزوابه

والتبع من خلقته ماقيل صادوبه

كم واحدٍ بالرخى يفتل لك أشنابه

وعند اللوازم يضيع الّي تهقووبه

وكم واحدٍ يرتكي يادار دولابه

يبين بين العرب لياحتمى شوبه

لاتنشد عن الرجل أنشد عن أصحابه

ينبيك عن طيب فعله طيب مصحوبه

والسيف فعله يبين بكف قضابه

كله له نصاب وله حدٍ ومحدوبه

والبيت مايثبت الا بقوة أطنابه

ويشتد ياصارت الأطناب مكروبة

ولاتحسبه يبتسم كل من بلج نابه

سم الحيايا مع الأنياب مصبوبة

والي قبل فلقته ولم له عصابه

احذر منه قبل تأتي كل معصوبه

ولأضاع حقٍ وقف وراه طلابه

وبعض البشر ياطلبت تجيك مطلوبه

هذي حقوقٍ تبي حلوق تقدابه

ومن هان نفسه تر الادنين هموبه

نعيش في كوكبٍ أشباح وذيابه

من لم يكن ذيب يطلع خارج النوبه

( ياخلصت للناس تقل انك تمهزابه

يدَّك تمده وفا وتجيك مقلوبة )

ولكل شيٍ زوال بزولة أسبابه

أقدار وأجال بالألواح مكتوبه