عساك عالقوة

دامك نويت الفراق او هبة غيوم الغرام بهذه العبارات والعاطفة جاء بهذا النص العاطفي ليصافحكم بن سعيّد

هبة غيوم الغرام وجيت في بالي

ولاحت بروق الغياب وعكرت جوه

الذكره اللي من غيابك تروالي

تطري على هاجسي لاصرت بخلوه

الشوق يا صاحبي بالجوف همالي

مثل السحايب ليا دف الهوى نوه

اشتاقلك شوقٍ مسمى وفعالي

شوقٍ سكن خافقي بسفله وعلوه

اقفيت عني ولا تنشد عن احوالي

والحزن عقبك سطى للحال بالقوه

صدقت فيني كلام القيل والقالي

ودرب الوصل ما انتهى توه بدى توه

نسيت ذاك الغرام وطعت عذالي

ونسيت حق الوفى والطيب والخوه

بعت الغلا والموده بسوق الانذالي

صحيح مابك ضمير ولا بك مروه

يعنى كذا هالنهايه عزي لحالي

مشكور يا صاحبي عساك عالقوه

دامك نويت الرحيل وتقطع اوصالي

جمر المفارق تواقد بيننا ضوه

ماني معاتبك وماني متعبٍ حالي

سوه اللي بخاطرك واللي تبي سوه

ان جيتني غاليٍ وان رحت هم غالي

تبقى مليك الخفوق وسيد سموه

| شعر: عبدالرحمن عايد بن سعيد |