((ما بدلك بالنحاسي))

نص عاطفي رائع رغم سيطرة الياس ونار البعد مازالت العاطفة من خلال الشعر تقول من بوح المشاعر والاحساس

ياصاحبي والقلب خيم به الياس

تبطي وانا يكبر مع الوقت ياسي

اليا متى فكري مشوش ومحتاس

للبعد مالي حيل والصد قاسي

لو عشت بين الناس ماني مع الناس

شف غربتي ما بين ربعي وناسي

ريضان جوفي بعد فرقاك يباس

عقب المطر جاها تراب الرواسي

من دون شوفك حدني كم بلاس

اهل النقيلي حارسينك حراسي

اسفه حكاهم لين عادوا بالافلاس

ماهم كفو يثنون من قو باسي

اغيب لكن لايجي فيك وسواس

ماني من اللي للمحبين ناسي

واخترت لي فوق الشواهيق مجلاس

عن.زلةٍ يركض بها كل خاسي

وانا الذي من شبتي رافع الراس

اموت ماطخيت يابنت راسي

خلك على ما قيل للطيب نبراس

وليا لعبت تكون لاعب أساسي

ياللي عرفنا معدنك مابه نحاس

انت الذهب مابدلك بالنحاسي

حكي العواذل لجل عيناك ينداس

من لامني دونك تقول ختلاسي

يابو عيونً ساهياتً ونعاس

من نظرتك جسمي يجيه التماسي

تذبح بخرسٍ كنها عين قرناس

لاشالو البرقع على طول حاسي

وجدايلك ياغايتي تشبه الماس

كنها على ذروة متونك تواسي

وخدك بليا زخرفه تقل قرطاس

حالف عليه من الصبغ مايجاسي

قلته وانا قلبي به يدق هوجاس

والعين عيا لايجيها نعاسي

وكتبت من بوح المشاعر والاحساس

بنات فكري من خلايا حساسي

ماجبتهن للمصلحه والتغطراس

ولاني مؤجرهن سوات التكاسي