يا راكب اللي يوم تسمع وشيشه
وشيش رقطا ذيلها بالعصاء نيش
قامت تحك جنوبها مستهيشة
وتبين انياب سوات المناقيش
يمرج مع البيدا امراج الخريشة
إلى امرجت بين الوحش والنواحيش
من عقب ما هي للمنايا وليشة
بين الصقور ومبهمات النواتيش
حيت حياة اللي بتالي الحشيشة
عقب الدرك شرب القراح النقاريش
جمسٍ يربح كل من حط شيشة
يتعب بتعبيته طوال الخراطيش
إلى وقف يكوي الكبود الغشيشة
والى مشى ما يلحقه مومي الريش
برقٍ من العارض جذبني رعيشه
يوم يتلالا بالمزون المراهيش
واثره ما يسقي الكبود العطيشة
يبرق ويرعد مير مدري على ويش
لا تحتزم باللي ضلوعه هشيشة
اللي ليا سمع النداء صد تطنيش
لا تحتزم به لو تحيزم بخيشة
ما يقطع الديان ركض الاكاديش
وبيت بليا ساس مثل العريشة
يطيح لو لمع ببويه وورنيش
وجرد السهال الخاليات الوحيشة
اللي تطوى في شجرها الحنافيش
اخير من ضله ،،، وبعض المعيشة
يعافها الطيب،،، ويفرح بها الديش
وقال المثل ما من ورى طلع بيشة
عيشة وراس الضبي ما به عراميش