مع السلامة

الناس تسأل عن غيابه وش أسبابه ؟

وأنا أكذّب / أقول البارحه جاني

مقدر أقول الحقيقه وسبّة غيابه

إن المصالح خذْته لـ واحدٍ ثاني

المشكله إنّي أسولف به وأزهابه

هو أكثر أنسان خاويته وخاواني

فرشت عمري على شان إيْتهنّى به

واليوم شفته فرش عمره ل حرماني

الناس أجناس وبعض الناس لعّابه

تذكرني اليوم وباجر راح تنساني

قالوا لي قبل يتعشّابك / تغدّابه

وأنا تركته / تغدّاني / وتعشّاني

هيّلت نفسي غلا والشوق ماجابه

وشفت العواذل من غيابه أتقهواني

الحب في هالزمن ماعاد نسعى به

ب صك قلبي وشعوري وكل وجداني

والقلب ماعاد ينبض حب لـ أحبابه

مجروح ومصدوم ومتضايق وأذّاني

خلاص مـ أرضى على شوفه ولاأرضى به

مدامه أبعد / عن أحساسي وخلاّني

مع السلامه / وكل دربٍ ويلقا به

شخصٍ يعلمه مدا حزني وما جاني

الله يبلاه في مثله / ويشـقى به

وباجر أشوفه وأقول: الله لايبلاني

من كان يجهل مقامي ويعلن غيابه

يندم مدامه على الزله / يتحرّاني

ياصاحبي من يسكر بالوصل بابه

ماعاد أجي له لو إنّه أكبر أخواني